Нурлатның ел хатын-кызларын котладылар

8 Март – Халыкара хатын-кызлар бәйрәменә багышлап шәһәр Мәдәният сараенда узган чарада “Ел хатын-кызы. Ел ир-аты хатын-кыз күзлегенән” конкурсы җиңүчеләрен котладылар.

Традиция буенча чара гүзәл затларның иңнәренә ак яулыклар салудан башланды. “Соцторгсервис” һәм “Татнефть” ОРС җәмгыятьләре әзерләгән  камыр  ризыклары, укучыларның кул эшләреннән торган күргәзмәләр, матурлык салоны тәкъдим иткән хезмәтләр, мул чәй табыны, чәчәкләр һәм чын күңелдән әйтелгән котлау сүзләре – барысы да  гүзәл затларга багышланды.  Чәршәмбе көнне ТР Дәүләт Советы җитәкчесе Фәрит Мөхәммәтшин белән очрашуда булып кайткан “Ел хатын-кызы. Ел ир-аты хатын – кыз күзлегеннән” Республика конкурсы җиңүчеләре дә билгеләп үтелде.

Район башлыгы Равил Кузюров  районның барлык әниләрен, хатын-кызларын һәм гүзәл затларын язның иң матур бәйрәме белән котлап, һәрбарчысына рәхмәт сүзләре һәм ихтирам белдерде. Шунда ук конкурсның “Хатын-кыз ана” номинациясе җиңүчеләре Мәдинә Ишкинеева, Әминә Шәйхетдинова һәм Наилә Морзахановага Рәхмәт хатлары һәм истәлекле бүләкләр тапшырды.

Конкурсның район, зона һәм республика туры җиңүчеләре Галина Терентьева, Венера Каняфина, Фәридә Сәгыйрова, Надежда Агафонова, Рушания Ханиева, Зинаида Богданова, Фәүзия Мөхәммәтова, Татьяна Фадеева, Алсу Садретдинова, Гөлсинә Фәтхетдинова, Роза Әхмәтҗанова һәм залда утырган барлык гүзәл затларны район башкарма комитеты җитәкчесе Әсгать Габдуллин һәм башка мәртәбәле җитәкчеләр котладылар.  “Алтын йөрәкле ир-ат” номинациясендә җиңү яулаган Идрис Кәримов, “Ир-ат лидер” Нәгыйм Сафиуллин да районыбызның җитәкче хатын-кызлары иң матур теләкләрен җиткерделәр. Залга җыелган барлык хатын-кызларны матур җырлары белән сәламләгән “Татар моңы” Халыкара телевизион фестивале, халыкара конкурслар  лаулареатлары Фердинант Сәлахов, якташыбыз Сирень Зәйнетдинова чыгышлары, Балалар сәнгать мәктәбе укучыларының хореграфия композицияләре бәйрәмгә җылык, ямь һәм кәеф өстәделәр.