Түбән Нурлат микрорайоны халкын экология проблемасы борчый

Бүген Түбән Нурлат мирорайонында район башлыгы Равил Кузюров, шәһәрнең барлык служба җитәкчеләре катнашында үткән гражданнар җыенында халыкка үзләрен борчыган башка күптөрле сорауларны күтәрергә җай чыкты. Түбән Нурлат 2001нче елдан бирле шәһәр составында, узган елда биредә модульле ФАП, 2012нче елда “Бәләкәч” балалар бакчасы ачылды, микрорайонда 800дән артыграк кеше яши. Халыкны Кондырча елгасының, янәшәдәге әрәмәлекнең экологик торышы борчый, мәдәният йортына капиталь ремонт кирәк, кайбер урамнарда су проблемасы кискен тора, асфальт юл да бер урамда гына. Халык шулай ук полициянең участок уполномоченныеның кабул итү сәгатьләрен булдыру, хәзерге вакытта 8нче мәктәп филиалы булып эшләүче башлангыч мәктәпне тугызъеллык итеп ачу, мәктәп автобусының эшен яхшырту, авыл статусын кайтару һәм башка шундый теләк-тәкъдимнәрен җиткерде. Район башлыгы Равил Кузюров әлеге проблемаларны өйрәнәчәкләрен, иң беренче чиратта,  экология, мәдәният йортына капиталь ремонт ясау мөмкинлеген караячакларын, көн кадагындагы юл хуҗалыгы, су мәсьәләләрен хәл итү өстендә эшләячәкләрен әйтте.