Нурлатлылар Олимпия үрәкәтенә теләктәш

Сочидагы кышкы уеннарны рекордлы күләмдә кунаклар карар дип көтелә. Планетаның меңләгән кешесе кебек үк Нурлат районы халкы да  кышкы Олимпия уеннарын ачу тантанасын зарыгып көтә, ә спортчыларыбыз тулы көченә ярышларга әзерләнә.
- Дөрес, Олимпия ярышларына түгел, ә республика, районкүләм бәйгеләргә әзерләнәбез, - ди район башкарма комитетының яшьләр эшләре һәм спорт бүлеге җитәкчесе Әнәс Нәбиуллин.  – Спортчыларыбыз Олимпиаданы район, республикакүләм ярышларны җиңеп,  кубок һәм медальләр белән каршы алалар. Олимпия ярышларына килгәндә, аларны кичә үк карый башладык. Россия данын сноубордчы Алексей Соболев, фристайлчылар Регина Рәхимова, Марика Пертахия, Екатерина Столярова һәм Елена Муратова башлап җибәрделәр. Ә аннан кич белән ир – атлар һәм спортчы парлар арасында узган фигуралы шуу буенча ярышларны карадык.
- Безнең Россия спортчылары Олимпия медальләрен күбрәк җыйсын иде,- диләр җәйге Универсиада факелын йөртүчеләр, Галимҗан Хөсәенов исемендәге балалар – үсмерләр спорт мәктәбе тренерлары Наталья Горшкова һәм Ленар Фәтхетдинов,  җыелма командага теләктәшлек белдереп.  – Спортчыларыбыз өчен борчылып, югары нәтиҗәләргә ирешсеннәр дип көч биреп торачакбыз. Һәм аларның һәркайсы мактау пьедесталында буласына ышанабыз.
 Ә бүген Мәскәү вакыты буенча 20.14 сәгатьтә Сочиның “Фишт” Олимпия стадионында әлеге зур спорт чарасын ачу булачак.  Тамашачыларны гаҗәеп шоу көтә.  Бәйрәм чараларын “Россия-1” һәм “Беренче канал” телеканналары трансляцияләячәк.