Нурлат укытучысы республика педагогик тәҗрибә конкурсы призеры булды
Нурлат гимназиясендә горурланыр өчен чираттагы сәбәп: башлангыч сыйныфлар укытучысы Габдрахманова Гөлнара Гомәр кызы республиканың иң яхшы практиклар конкурсында призлы урынны яулады.
Чара Татарстан Республикасында аутизм турында мәгълүмат тарату буенча Бөтенроссия атналыгы кысаларында уздырылды.
Конкурсның финалы 11 мартта онлайн-форматта узды. Гөлнара Гомәр кызы жюри хөкеменә үзенең методик эшләнмәсен тәкъдим итте һәм аны экспертлар алдында уңышлы яклады. Сынау йомгаклары буенча Нурлат гимназиясе педагогы мактаулы II урынга лаек булды.
Конкурс Татарстан Республикасы Мәгариф һәм фән Министрлыгы һәм «Росток»ҮППРК ярдәмендә узды. Нурлат укытучысының эшенә югары бәя бирелүе үсеш үзенчәлекләре булган балаларга ярдәм итү эшенең әһәмиятен ассызыклый һәм район педагогик составының югары профессиональ дәрәҗәсен күрсәтә.
Гөлнара Гомәр кызын лаеклы җиңүе белән котлыйбыз һәм алга таба да педагогик эшчәнлегендә уңышлар телибез!