Нурлат автоинспекторлары ялларда шәхси транспортта йөрүдән тыелырга киңәш итә
Метеорологлар мәгълүматларына караганда, якындагы ике көндә төбәктә һава торышының начараюы көтелә: кар күп явачак, буран һәм җилнең тизлеге көчәячәк. Мондый шартларда шәһәр яны трассаларына чыгу, күз күременең кискен начарлануы, кар көртләре һәм бозлавык барлыкка килү аркасында аеруча куркыныч булачак.
Шәһәрдә шулай ук шәхси транспортны куллануны минимумга калдырырга киңәш ителә.
"Безнең төп бурыч — куркынычсызлык. Гражданнардан аңлап карауларын сорыйбыз, әгәр сәфәр ашыгыч һәм тормыш өчен кирәк булмаса, аннан баш тарту яхшырак", - дип билгеләде Дәүләт автоинспекциясенең Нурлат бүлеге башлыгы.
Автоинспекторлар шулай ук руль артына утырырга мәҗбүр булган машина йөртүчеләргә дистанцияне төгәл үтәү, тизлекне киметү, җәяүлеләргә һәм юл техникасына игътибарны арттыру кирәклеген искәртә. Яктылык приборларының төзеклеген тикшерү, автомобильдә тулысынча корылган телефон һәм кышкы авария запасы булу тәкъдим ителә.
Фото: «Нурлат-информ» архивыннан.