Нурлат шәһәре Журналистлар скверында «Дуслык агачы» барлыкка килде
«Россия өметләре» фестивале «Күршеләр – иң бердәм кешеләр» проекты кысаларында уздырылды.
Нурлатта күңелле вакыйга булды – «Нурлат йолдызлыгы» АКО «Күршеләр – иң бердәм кешеләр» проекты кысаларында Журналистлар скверында «Россия өметләре» фестивален уздырды. Бу масштаблы «Күрше» республика фестиваленең һәм «Татарстанда - кыш» проектының бер өлешенә әверелгән циклның өченче чарасы.
Бәйрәмдә Нурлат муниципаль районы Башлыгы Дамир Ишкинеев катнашты. Кунаклар арасында иҗади интеллигенция вәкилләре һәм каләм ветераннары, шулай ук актив волонтерлар аерым урын алды.
Бәйрәмнең кульминациясе «Дуслык агачы» архитектура формасын ачу булды. Арт-объект өчен урын символик рәвештә сайланган: Журналистлар скверы «Дуслык кубы» янында урнашкан. Конструкцияне урнаштыру берьюлы өч мөһим датага: «Дуслык» район газетасының 95 еллыгына, Татарстанда хәрби батырлык һәм хезмәт фидакарьлеге елына һәм Россиядә Халыклар бердәмлеге елына багышлана. Арт-объектны төзү өстендә дизайнер Елена Мингалимова һәм эшмәкәр Айрат Мостафин эшләгән.
Экспозицияне ачу хокукы Дамир Ишкинеевка, проект җитәкчесе Резеда Гиняевага һәм ветеран - журналистлар Валентин Бурайкин һәм Сәкинә Хәйруллинага бирелде.
"Без бу йомгаклау фестивален нәкъ менә журналистлар скверында уздырырга уйлавыбыз очраклы түгел. Татарстанда каләм хезмәткәрләренә бердәнбер һәйкәл куелган шәһәрнең иң яңа һәм символик почмакларының берсе ул. Без бу скверның барлык нурлатлылар өчен җанлы урын булуын, ә яңа арт-объект аңа җылылык һәм яктылык өстәвен чын күңелдән теләгән идек. Безнең проект шуны күрсәтте: күршелек – ул сүз генә түгел, җәмгыятьнең нигезе. Без бу чаралар циклын горурлык белән тәмамлыйбыз, чөнки аларның һәркайсы төрле яшьтәге йөзләгән кешене берләштерде. Бүген "Дуслык агачы" үз тамырларын биредә җибәреп, бер-беребезгә ярдәм итеп кенә көчле булып калуыбызны искәртә. Район Башлыгы Дамир Ишкинеевка, безнең партнерларыбызга һәм Нурлатның һәр кешесенә безнең идеягә ышанганнары һәм аны тормышка ашырганнары өчен зур рәхмәт», – дип билгеләп үтте «Күршеләр-иң бердәм кешеләр» проекты җитәкчесе Резеда Гиняева.
Проект Фестивале кысаларында кысаларында игълан ителгән иҗади ярышларга йомгак ясалды. «Дуслык»(«Дружба», «Туслах») газетасында җирле авторларның патриотик әсәрләрен укучылар конкурсында җиңүчеләрне, шулай ук «Дуслык яшәгән йорт» конкурсының иң яхшы басмалары авторларын бүләкләделәр. Проектны гамәлгә ашыруда ярдәм иткән партнерларга аерым рәхмәт сүзләре җиткерелде, аларга тантаналы шартларда Рәхмәт хатлары тапшырылды. Монда ук патриотик әсәрләре белән алгы сызыкта көрәшүчеләргә ярдәм иткән шагыйрьләрне хөрмәтләделәр.
Фестивальнең аерым блогын алгы сызыкта көрәшчеләргә ярдәм итүчеләргә багышладылар. Бүген Нурлат районында 187 волонтер төркеме эшли. Аларның тырышлыгы, шулай ук предприятиеләр һәм халык ярдәме белән фронтка 625 тонна гуманитар йөк һәм 90 берәмлектән артык техника озатылган. Сәхнәдә тәҗрибәле активистларны да, яшь волонтерларны да хөрмәтләделәр. Янәшәдә зур күргәзмә оештырылды, анда шәһәр һәм авыллардан килгән иреклеләр СВО ихтыяҗлары өчен ясаган үз кул эшләнмәләрен тәкъдим итте.
Скверда чын-чынлап җылы атмосфера хөкем сөрде. Кунаклар кайнар чәй белән җылынды, балалар «Пингвиннар һәм ишегалды могҗизалары» интерактив уенында катнашты, ә гаиләләр «Без - бердәм» турнирында көч сынашты. Бәйрәм рухын «ДоброГрани» волонтерларының якты флешмобы, «Умырзая» вокаль ансамбле чыгышлары һәм мәдәният хезмәткәрләренең музыкаль номерлары баетты.
Белешмә: «Курше» проекты республика рәисе Рөстәм Миңнеханов ярдәме белән Татарстан Республикасы шәһәрләрен үстерү институты тарафыннан тәкъдим ителгән. Ул «Безнең ишегалды» программаларының һәм иҗтимагый киңлекләрне үстерүнең эзлекле дәвамы булып тора.