Нурлат районында ата-аналар комитетларының «Тату сыйныф серләре» республика конкурсы муниципаль этабы узды
«Яшьләр һәм балалар» илкүләм проектын, «Без бергә» программасын гамәлгә ашыру кысаларында Нурлат районында ата-аналар комитетларының «Тату сыйныф серләре» республика конкурсы муниципаль этабы узды.
Чара А.С. Әхмәтшин исемендәге «Киләчәк» үзәге базасында узды.
Конкурсның төп максаты укучыларны тәрбияләүдә белем бирү оешмалары һәм ата-аналар комитетларының үзара хезмәттәшлегенең иң яхшы тәҗрибәләрен ачыклау һәм популярлаштырудан гыйбарәт.
Конкурс традицион гаилә рухи-әхлакый кыйммәтләре нигезендә балаларны гаиләдә тәрбияләү мәдәниятен саклап калуга, ныгытуга һәм үстерүгә ярдәм итүгә юнәлдерелгән.
Конкурста Нурлат районы гомуми белем бирү оешмаларының 5-11 сыйныф укучыларының ата-аналар комитетлары катнашты. Команда составы 12 кеше берьюлы сәхнәдә.
Конкурста катнашучылар 4 сынауны узды:
1. Визит карточкасы «Безнең күңелле дус сыйныф!». Ирекле формада.
2. «Бердәм сыйныф серләре» күргәзмәсе.
Үз эченә фотоальбом, стена газеталары, плакатлар, уртак иҗади проектлар, портфолио һ. б. ала.
3. Иҗат номеры (Россия халыклары бердәмлеге елына багышланган).
4. «Бердәм тәрбия мохите: ата-аналар, балалар, сыйныф җитәкчесе һәм тәрбия буенча киңәшче» иҗади проектын яклау.
Конкурс йомгаклары буенча җиңүчеләр булып түбәндәгеләр танылды:
1 нче мәктәпнең ата-аналар комитеты гран-при
1-урын: Нурлат гимназиясенең ата-аналар комитеты;
2-урын: 4нче мәктәпнең һәм Киекле мәктәбенең ата-аналар комитеты;
3-урын: 2нче һәм Мамык урта мәктәпләренең ата-аналар комитеты.
Барлык җиңүчеләрне мактау грамоталары һәм татлы призлар белән бүләкләделәр.
Җиңүчеләргә 2026 елның февралендә узачак конкурсның зона этабында уңышлар телибез!
Без сезнең казанышларыгыз белән горурланабыз һәм алда сезне яңа җиңүләр һәм уңышлар көтүен теләп калабыз!