Нурлатта районда террорчылыкка каршы эшчәнлек мәсьәләләре турында фикер алыштылар
Район Советының зур залында Нурлат районының террорчылыкка каршы көрәш комиссиясе утырышы булды.
Район Башкарма комитеты җитәкчесе Әсгать Габдуллин җитәкчелегендә аның эшендә хокук саклау органнары, прокуратура, җирле үзидарә органнары вәкилләре, авыл җирлекләре башлыклары, шәһәр мәгариф, мәдәният учреждениеләре җитәкчеләре һәм башкалар катнашты.
Утырыш профилактик видеороликлар караудан башланды.
Террорчылыкка каршы көрәш комиссиясе секретаре Рәфис Нигъмәтуллин комиссиянең 2025 елгы эш нәтиҗәләре турында хисап тотты. Аның билгеләп үтүенчә, төп көч, профилактика эшчәнлегеннән тыш, террорчылык янауларына дучар булган объектларның террорчылыктан саклануын ныгытуга, шулай ук саклау корылмаларын (яшеренү урыннарын) тикшерүгә юнәлдерелгән.
"Башкарма комитет тарафыннан саклау корылмалары реестры төзелде, шәһәрнең интерактив картасы рәвешендә мәгълүмат идарәче компанияләргә һәм халыкка җиткерелде. Быел шулай ук укыту-консультация пунктлары, дини оешмалар һәм кешеләр күпләп була торган урыннар тикшерелде», – дип ассызыклады Рәфис Рифгать улы.
Район Башкарма комитетының мәгариф бүлеге җитәкчесе Алсу Рәхмәтуллина 2025 елда Нурлат районы мәгариф учреждениеләрендә террорчылык һәм экстремизм идеологиясенә каршы торуның комплекслы планы чараларының үтәлеше турында сөйләде.
Утырыш барышында шулай ук Заречный һәм Әхмәт авыл җирлекләрендә террорчылыкка һәм экстремизмга каршы көрәш эше турында докладлар тыңланды. Заречный авыл җирлеге башлыгы Людмила Еливанова һәм Әхмәт авыл җирлеге башкарма комитеты секретаре Ирина Сапожникова үз территорияләрендә социаль һәм иҗтимагый-сәяси хәлнең тыныч булуын, милләтара мөнәсәбәтләрнең тотрыклы булуын билгеләп үттеләр. Милли яки дини нигездә бәрелешләргә китерергә сәләтле көнкүреш конфликтлары һәм вакыйгалар теркәлмәгән.
Йомгак ясап, Әсгать Касыймович бәйрәм алды һәм Яңа ел көннәрендә аеруча уяу булырга һәм һичшиксез террорчылыкка каршы куркынычсызлыкны тәэмин итәргә өндәде.