«Татарстан Республикасында Гигиена һәм эпидемиология үзәге» ФБУЗның Нурлат филиалы халыкка цифрлы маркировка системасы турында искә төшерә
Бу формальлек кенә түгел, ә контрафакт продукция белән көрәшергә һәм кулланучылар хокукларын якларга ярдәм итә торган нәтиҗәле корал.
Цифрлы маркировка нәрсә ул һәм ул ни өчен кирәк соң?
Товарның һәр берәмлеге өчен цифрлы паспортны күз алдына китерегез. Маркировка системасы продукциянең җитештерүчедән сатып алучыга кадәр узган юлын күзәтү өчен булдырылган. Бу мөмкинлек түбәндәгеләргә ирешергә ярдәм итә:
Легаль булмаган базарны юкка чыгарырга: ялган әйберләр, контрабанда һәм «прилавка астыннан» товарлар сату белән көрәшергә.
Намуслы бизнесны якларга: барлык эшмәкәрләр өчен тигез шартлар тудырырга.
Сатып алучыларга сыйфатны гарантияләргә: кулланучыларга оригиналь һәм куркынычсыз товар сатып алуларына ышаныч бирергә.
Бу ничек эшли?
Товарны төрүгә махсус код салына — ешрак DataMatrix квадрат штрихкоды рәвешендә. Ул QR-кодка охшаган, ләкин ышанычлырак. Бу кодта продукт турында бөтен мәгълүмат шифрланган: аны кем җитештергән, кайда һәм кайчан, аның яраклылык вакыты нинди һәм ул гомумән легальме икәне турында.
Сатып алучыга товарны ничек тикшерергә?
Продукт турындагы бөтен мәгълүматны белү өчен гади смартфон да җитә.
Кушымталар аша (App Store яки Google Play) бушлай «Честный знак» кушымтасын урнаштырыгыз.
Кушымтадагы телефон камерасы ярдәмендә төргәктәге кодны сканерлагыз.
Товар турында тулы мәгълүматны укыгыз. Әгәр продукт легаль булса, сез шунда ук аның тасвирламасын, җитештерүче турындагы мәгълүматларны һәм яраклылык срокларын күрерсез.
Әгәр товар тикшерү үтмәгән икән, бу очракта нишләргә?
Әгәр дә кушымтаны сканерлаудан соң товар системада табылмаганлыгын, җитештерүдән алынганлыгын яки аның турында мәгълүмат чынбарлыкка туры килмәгәнлеген күрсәтсә - димәк борчылырлык сәбәп бар. Сез шунда ук хокук бозу турында кушымта аша хәбәр итә аласыз. Мәгълүматлар тикшерү өчен контроль органнарына автомат рәвештә тапшырыла.
Иҗтимагый контрольнең әһәмияте
«Честный знак» ярдәмендә товарны һәр тикшерү — легаль булмаган базар белән көрәшкә өлеш кертү. Сатып алучыларның аңлы сайлавы һәм уяулыгы кибет киштәләрен фальсификаттан чистартырга һәм гражданнарның сәламәтлеген сакларга ярдәм итә торган көчле йогынты ясау алымы булып тора.
Шул рәвешле, цифрлы маркировка — ул безнең һәрберебез өчен сыйфатлы һәм куркынычсыз товарлар гына сатып алуның гади һәм нәтиҗәле ысулы.