Ярминкә нурлатлыларны авыл хуҗалыгы продукциясенең киң ассортименты белән сөендерде
Традиция буенча ярминкә мәйданы Кооператив урамында җәелдерелде.
50дән артык сәүдә ноктасында шәхси ярдәмче һәм фермер хуҗалыклары башлыклары, шулай ук шәхси эшмәкәрләр һәм авыл хуҗалыгы товар җитештерүчеләре сөт һәм ит продукциясе, балык, бал, йомырка һәм башка бик күп продукция тәкъдим итте.
Бигрәк тә сезонлы продукциягә: кош итенә, яшелчәләргә, алмага ихтыяҗ зур булды. Ассортимент чыннан да зур һәм төрле иде. Әйтик, тавык түшкәләрен килограммы 450 сумнан, ә үрдәк һәм казларны 700 сумнан сатып алырга мөмкин иде.
Якты Күл авылыннан Яруллиннар гаиләсе нигездә йорт кошларын үзләре өчен үстерә.
"Азык-катнаш азык, фураж быел кыйммәт, шуңа күрә артыгын ярминкәгә чыгарабыз. Азыкка сарыф ителгән акчаларның бераз гына булса да кайтуын телибез. Ел саен 50 үрдәк һәм 100 каз үстерәбез", - дип уртаклашты Рәмзия Яруллина.
Кишер, бәрәңге, чөгендер, суган, помидор, кәбестә, сарымсак һәм башка культуралар да сатуда бар иде. Нурлаттан Виктор Паймушкин боларның барысын да үзенең йорт яны участогында үстерә һәм салкыннар башланыр алдыннан ярминкәдә артыгын сатарга карар кылган.
«Хәзер кабакка ихтыяҗ зур, торма һәм шалканны да яхшы алалар", - дип билгеләде ул.
Би Күле авылыннан Васил Садретдинов бу ярминкәдә кул токмачы һәм йомырка сатты.
«Без һәр ярминкәгә чыгарга тырышабыз, хәтта Чаллыга да бардык – бөтен артык яшелчәләрне саттык. Нигездә күпләп кишер үстерәбез, бу бәрәңгегә караганда отышлырак. Ә бакчабыз зур, 40 сутый чамасы. Ярминкәләрдән файда бик зур", - дип сөйләде ул.
Садретдиновларның токмачы да бик популяр булып чыкты, һәм шәһәр халкы арасында аларның даими сатып алучылары барлыкка килгән инде.
Нурлаттан Лидия Зәйдуллина бер генә ярминкәне дә калдырмый икән. Ул якында гына яши, шуңа күрә 78 яшендә дә авыл хуҗалыгы продукциясен алырга бару аңа авырлык китерми.
"Ярминкә ике атнага бер генә тапкыр эшләве кызганыч, - дип уртаклашты ул. - Менә йомырка, сөт, сыр, эремчек сатып алдым-барысы да авылныкы, тәмле. Хәзер өйгә илтәм дә ит алырга киләм".
Нурлат районы Башлыгы урынбасары Иван Захаров иртә таңнан ярминкә эше, бәяләр һәм ассортимент белән танышты. Ул сәүдә рәтләре буйлап йөреп чыкты, эшмәкәрләр һәм фермерлар белән аралашты, алар белән продукция сату мәсьәләләре турында сөйләште.