Нурлат районында юл хәрәкәте кагыйдәләрен саклау комиссиясе утырышында үлемгә китерә торган юл-транспорт һәлакәте шартлары турында фикер алыштылар
ЮХИДИ һәм үзәк район хастаханәсе җитәкчеләре тикшерү барышы һәм зыян күрүчегә ярдәм күрсәтү турында хәбәр иттеләр.
Бүген, 7 ноябрьдә, район Башкарма комитеты җитәкчесе вазифаларын башкаручы Радик Гыйниятуллин җитәкчелегендә Нурлат районының Юл хәрәкәте иминлеген тәэмин итүнең муниципаль комиссиясе утырышы булды. Утырышның төп темасы 3 ноябрьдә булган һәм бер кешенең гомерен өзгән фаҗигале юл-транспорт һәлакәте турында фикер алышу булды.
Исегезгә төшерәбез, авария автомобиль йөртүче гражданин И.ның РФ Юл хәрәкәте кагыйдәләренең 9.1 һәм 10.1 пунктларын бозуы нәтиҗәсендә килеп чыккан. Беренчел мәгълүматлар буенча, ул хәрәкәтнең куркынычсыз тизлеген сайламаган, транспорт чарасының юлда тиешле хәрәкәтен бозган, шуннан соң автомобиль каршы якка таба төшкән һәм ауган. Авария нәтиҗәсендә машина йөртүче алган җәрәхәтләрдән Нурлат район үзәк хастаханәсендә вафат була.
Вакыйга турында доклад белән Россия Эчке эшләр министрлыгының Нурлат районы буенча ЮХИДИ идарәсе башлыгы Олег Анжаков чыгыш ясады. Ул юл-транспорт һәлакәтен тикшерүнең барышы турында комиссиягә җентекләп мәгълүмат бирде. Моннан тыш, Олег Анжаков муниципалитетның транспорт оешмаларына машина йөртүчеләр белән юл хәрәкәте иминлеге мәсьәләләре буенча профилактик эшне активлаштырырга һәм даими рәвештә үткәрергә тәкъдим итте.
Зыян күрүчегә медицина ярдәме күрсәтү турында Нурлат үзәк район хастаханәсе баш табибы Айдар Сәгъдиев сөйләде. Ул медицина хезмәткәрләренең һәлакәт урынында һәм стационар шартларында эшләве турында җентекләп сөйләде.
Көн тәртибе кысаларында комиссия райондагы аварияләргә йогынты ясый торган башка мөһим мәсьәләләрне дә карады. Утырыш йомгаклары буенча комиссия әгъзалары киләчәктә мондый фаҗигаләрне булдырмауга һәм Нурлат районы юлларында куркынычсызлыкны арттыруга юнәлдерелгән йөкләмәләр формалаштырды.