Нурлатта Халыклар бердәмлеге көненә багышланган “Бердәм гаилә" дигән бәйрәм концерты узды
Нурлатлыларга һәм шәһәр кунакларына сәламләү сүзләре белән Нурлат районы Башлыгы вазыйфаларын башкаручы Иван Захаров мөрәҗәгать итте. Үз чыгышында ул бәйрәмнең тирән әһәмиятен ассызыклады.
"4 ноябрь – миллионлаган россиялеләрне берләштерә торган, күпмилләтле халкыбызның көчен һәм бердәмлеген символлаштыра торган көн, - дип билгеләде Иван Николаевич. - Нурлат районы татар, рус, чуваш һәм башка милләт вәкилләре тату яши торган халыкларның чын туганлык һәм дуслык үрнәге булып тора".
6 ноябрьдә билгеләп үтелә торган Татарстан Республикасы Конституциясе көне турында сөйләгәндә, Иван Захаров 1992 елда кабул ителгән Төп закон республиканың хокукый статусын, гражданнарның хокукларын һәм бурычларын билгели һәм аны үстерү өчен ныклы нигез булып тора, дип билгеләп үтте.
Россия Федерациясе гражданины паспортларын тапшыру тантанасы бәйрәмнең символик һәм якты мизгеле булды. Яшь нурлатлылар Варвара Хаткевич, Богдан Муляков, Дамил Газизов һәм Рузанна Сөләйманова үзләренең төп документларын тантаналы шартларда алдылар. Аларга шулай ук «Бердәм Россия» партиясенең Нурлат җирле бүлекчәсеннән истәлекле бүләкләр тапшырылды.
«Мондый истәлекле бәйрәмдә – халыклар бердәмлеге көнендә паспорт алу бераз дулкынландыргыч, шул ук вакытта горурлык хисе дә кичерәм», – дип уртаклашты 3нче мәктәп укучысы Рузанна Сөләйманова.
Бәйрәм концерты районның мәдәни күптөрлелегенең чын чагылышына әверелде. Яшь талантлар, иҗат коллективлары һәм ялгыз башкаручылар тамашачыларга татар, рус һәм чуваш телләрендә җырлар тәкъдим итте, ә бию ансамбльләре дәртле халык биюләрен башкарды. Чара тагын бер кат Россиянең көче – анда яшәүче барлык халыкларның гореф-гадәтләренә бердәмлектә һәм хөрмәт итүдә булуын күрсәтте.