Нурлат районыннан йөз яшен тутырган ветеран укытучыга өлкәннәр көне уңаеннан бәйрәм бүләге тапшырылды
Татарстанда йөз яшен тутырган 294 кешенең барысына да республика Рәисе бүләкләре тапшырылачак.
Өлкәннәр ункөнлеге кысаларында Татарстанда үзенчәлекле акция уза: республиканың 100 яшьтән узган барлык озын гомерле өлкәннәр бәйрәм бүләкләрен алачак. Мондый карарны Республика Рәисе Рөстәм Миңнеханов кабул итте. Аларның икесе Нурлат районында яши. Болар-Чулпан авылыннан Бөек Ватан сугышы ветераны Каим Сәмигулла улы Сәмигуллин һәм Яңа Иглай авылыннан Фәйзә Вәлиәхмәт кызы Гобәйдуллина.
Шушы көннәрдә район Башкарма комитеты җитәкчесенең социаль мәсьәләләр буенча урынбасары вазифасын башкаручы Әлфия Галәүтдинова Яңа Иглай авылыннан Фәйзә Вәлиәхмәт кызы Гобәйдуллинага шәхсән үзе килеп, аны 100 яшьлек Юбилее белән котлады.
Фәйзә Вәлиәхмәт кызы 1925 елның 23 июнендә Кизләү авылында туа. Аның тормышы - ул тулы бер чорның чагылышы. Сигезенче сыйныфны тәмамлагач, Бөгелмә педагогия училищесына укырга керә. Бөек Ватан сугышы башлангач, әтисен фронтка алып китәләр, ә Фәйзәне Ульяновскига тимер юл салырга җибәрәләр.
1946 елда, сугыш беткәч, ул үзенең хыялына кире кайта – аның данлыклы педагогик эшчәнлеге башлана. 1946 елдан 1980 елга кадәр, өч дистә елдан артык, Фәйзә Вәлиәхмәт кызы үзен мәктәпкә багышлый, башлангыч сыйныфларда балалар укыта. Хезмәтендәге уңышлары өчен ул берничә тапкыр Мактау грамоталары белән бүләкләнә, шулай ук «Хезмәт ветераны» һәм «В.И. Ленинның тууына 100 ел тулу уңаеннан Фидакарь хезмәт өчен» медальләренә лаек була.
1948 елда Фәйзә Вәлиәхмәт кызы Таһир Шәймәрдән улы Гобәйдуллинга кияүгә чыга. Алар бергә биш бала тәрбияләп үстерәләр. Бүген аның төп горурлыгы-зур һәм тату гаиләсе: 12 оныгы, 15 оныкчыгы һәм инде 1 оныгының оныгы бар.
Фәйзә Вәлиәхмәт кызын авылдашлары бик ихтирам итә, аны хаклы рәвештә авылның хөрмәтле ак әбисе дип атыйлар. Бүген ул улы һәм аның гаиләсе белән Яңа Иглай авылында яши, гаиләдә берничә буын өчен яраткан әни, әби һәм дәү әни булып гомер итә.
Йөзьеллык кешеләргә бүләкләр тапшыру акциясе-республика җитәкчелеге тарафыннан зирәклеге, ныклыгы һәм хезмәте бүгенге көн иминлеге өчен нигез булган өлкән буын кешеләренә тирән ихтирам һәм игътибар билгесе ул.