Дамир Ишкинеев Нурлат районында социаль объектлар төзү барышын тикшерде

2025 елның 27 сентябре, шимбә

Нурлат районы Башлыгы Дамир Ишкинеев ике мөһим объектта - Яңа Әмзә авылындагы «Заречный» балалар лагеренда һәм 8нче мәктәпнең яңа спорт залы төзелеше мәйданчыгында эшлекле күчмә киңәшмә үткәрде.

Инспекция барышында район Башлыгы төзелеш-монтаж эшләренең темплары белән танышты, подрядчылар белән агымдагы мәсьәләләр һәм эшләрнең барышы турында фикер алышты. Объектларны тапшыру срокларын үтәүгә аерым игътибар бирелде.

Киңәшмә йомгаклары буенча Дамир Ишкинеев подряд оешмаларына объектларны вакытында файдалануга тапшыруны тәэмин итү өчен эш темпларын көчәйтергә кушты. Социаль объектларны төзү һәм реконструкцияләү район үсешендә өстенлекле юнәлеш булып тора.