Бриллиант, зөбәрҗәт һәм алтын туйлар гөрли: Нурлатта гаилә тормышы юбилярларын котладылар
Ярты гасыр һәм аннан да күбрәк бергә яшәгән унбер пар район җитәкчелегеннән котлаулар кабул итте.
Никахлашу сараенда бүген җылы һәм күңелле атмосфера хөкем сөрде. Монда гаиләләре тугрылык, сабырлык һәм мәхәббәт үрнәге булган быел алтын, зөбәрҗәт һәм бриллиант туйларын билгеләп үтүче нурлатлылар җыелды. Барысы 11 пар.
Юбилярларны истәлекле дата белән котларга район Башкарма комитеты җитәкчесенең социаль мәсьәләләр буенча урынбасары вазифаларын башкаручы Әлфия Галәүтдинова килде. Ул Нурлат районы Башлыгы Дамир Ишкинеев исеменнән котлау сүзләрен җиткерде.
"Дистә еллар бергә мәхәббәт һәм татулыкта яшәү - ул зур хезмәт һәм бөек бәхет. Сез - районыбызның алтын фонды, ныклы гаиләләрегез балалар һәм оныклар өчен терәк, яшьләр өчен үрнәк булып тора, - дип мөрәҗәгать итте тантанада катнашучыларга Әлфия Галәүтдинова. – Чын күңелдән Сезгә ныклы сәламәтлек, үзара аңлашу, күңел җылысы һәм еллар узган саен ныгый барган мәхәббәт телим. Якыннарыгызның кайгыртуын һәм күңел җылысын тоеп яшәргә язсын. Ә без җитәкчелек ягыннан һәрвакыт сезгә ярдәм итәргә, истә тотарга, кадерләргә һәм хөрмәт итәргә тырышабыз һәм тырышачакбыз».
Изге теләкләрдән соң Әлфия Галәүтдинова һәр парга район җитәкчелеге исеменнән истәлекле бүләкләр тапшырды, юбилярларга ихлас теләкләрен һәм рәхмәт сүзләрен җиткерде.
Нурлат районы үзешчәннәре бәйрәм рухы өстәде. Алар тантанада катнашучы гаиләләр хөрмәтенә үзләренең иң яхшы музыкаль номерларын – мәхәббәт һәм тугрылык турында рус, татар һәм чуваш телләрендәге лирик җырларын бүләк итте. Концерт чын бүләк булды, күп кунаклар рәхәтләнеп кушылып җырладылар.