Нурлат районы Башлыгы итеп бертавыштан Дамир Ишкинеевны сайладылар
Нурлатта Нурлат муниципаль районы Советының беренче сессиясе узды.
Сессия эшендә Татарстан Экология һәм табигый байлыклар министры Александр Шадриков, ТР Дәүләт Советы депутаты Шамил Яһудин, Республика Рәисе Аппаратының җаваплы хезмәткәрләре катнашты.
Сессияне Нурлат районы Нурлат шәһәре Советы Рәисе урынбасары Николай Липатов алып барды. Ул хәбәр иткәнчә, район һәм шәһәрнең барлык сайлау округлары буенча депутатлар билгеләнгән тәртиптә сайланган һәм теркәлгән. 19 сентябрьдә районның барлык авыл җирлекләрендә, 22 сентябрьдә шәһәр җирлегендә вәкиллекле органнарның оештыру сессияләре узды. Моннан тыш, Нурлат шәһәр Советы карары белән агымдагы елның 22 сентябрендә Нурлат шәһәре Башлыгы итеп Дамир Азат улы Ишкинеев сайланды.
"Мәгълүмат бирү рәвешендә шуны хәбәр итәм, бүген шулай ук «Бердәм Россия» сәяси партиясе депутатлары җыелышы узды, аның нәтиҗәләре буенча Нурлат муниципаль районы Советында тиешле Фракция төзелде. Фракциянең җитәкчесе итеп Иске Чаллы авыл җирлегеннән депутат Иван Николаевич Захаров сайланды. Шулай ук Советлар карары белән һәр җирлектә Нурлат муниципаль районы Советында җирлек вәкилләре булып торган депутатлар сайланды», – дип билгеләп үтте Николай Пантелеймонович.
Район сессиясендә секретариат, хисап һәм редакция комиссияләре сайланганнан соң, депутатлар көн тәртибе буенча берничә мәсьәләне карадылар. Нурлат районының территориаль сайлау комиссиясе рәисе Ольга Бурнашевская бишенче чакырылыш Татарстан Республикасы Рәисен, Нурлат муниципаль районының авыл җирлекләре вәкиллекле органнары депутатларын сайлау нәтиҗәләре турында сөйләде.
Икенче мәсьәлә - Нурлат муниципаль районы Башлыгын сайлау турында Татарстан Экология һәм табигый байлыклар министры Александр Шадриков чыгыш ясады.
"Муниципаль район Уставы нигезендә Татарстан Республикасы Рәисе Рөстәм Нургали улы Миңнеханов исеменнән Нурлат муниципаль районы Башлыгы итеп сайлану өчен Сезнең карамакка Дамир Азат улы Ишкинеев кандидатурасын тәгъдим итәм. Дамир Азат улы соңгы өч ел дәвамында район белән уңышлы идарә итә. Бу чорда муниципаль районның төрле программаларда актив катнашуы нәтиҗәсендә сизелерлек нәтиҗәләргә ирешелде: мөһим социаль объектлар, торак йортлар, юллар, мәктәпләр, спорт мәйданчыклары төзелде һәм капиталь ремонтланды, – дип билгеләп үтте Александр Валерьевич, районда быел башкарылган эшләргә җентекләп тукталып. – Район башлыгы вазыйфасында эшләгән елларында Дамир Азат улы үзен кешеләр һәм хезмәт коллективлары белән эшләү буенча зур тәҗрибә туплаган нәтиҗәле һәм җаваплы җитәкче буларак танытты. Район Башлыгы итеп сайланганда һәм сезнең ярдәм белән Дамир Азат улы районның социаль-икътисади үсешенең катлаулы бурычларын уңышлы үтәячәгенә ышанам».
Иске Чаллы авыл җирлегеннән депутат, Нурлат муниципаль районы Советында «Бердәм Россия» партиясе фракциясе җитәкчесе Иван Захаров үз чыгышында билгеләп үткәнчә, Нурлат районы Советында «Бердәм Россия» партиясе депутатлар фракциясе җыелышында депутатлар тарафыннан муниципаль район Башлыгы һәм Нурлат районы Советы Рәисе вазифасына Дамир Азат улы Ишкинеев кандидатурасын карау тәкъдиме кабул ителгән, район һәм шәһәр Советлары депутатлары тулысынча аның кандидатурасын хуплый.
Ачык тавыш бирү барышында бертавыштан Нурлат муниципаль районы Башлыгы итеп Дамир Азат улы Ишкинеев сайланды.
Район Башлыгы ант кабул итте, депутатларга ышанычлары һәм ярдәмнәре өчен рәхмәт белдерде.
"Муниципаль берәмлек җитәкчесе вазифасын үтәүне, беренче чиратта, халкыбыз алдында зур җаваплылык дип кабул итәм. Сезнең ышанычны аклау өчен барысын да эшләячәкмен», – диде Дамир Азат улы.
Аннары көн тәртибендәге мәсьәләләрне депутатлар аның җитәкчелегендә карады.
Биредә үк депутатлар ачык тавыш бирү юлы белән район Башлыгы урынбасары итеп Иван Захаровны, районның Контроль-хисап палатасы рәисе итеп Марина Ибраһимованы сайлады.
Район Советының даими комиссияләре төзелү уңаеннан район Советы Регламенты нигезендә даими комиссияләрнең саны, исеме һәм күләме билгеләнде.
Татарстан Республикасы Нурлат муниципаль районы Советы Аппараты җитәкчесе вазифаларын башкаручы Лилия Фазуллина Нурлат муниципаль районы Башкарма комитеты җитәкчесе вазифасын биләүгә конкурс игълан итте.
Барлык мәсьәләләр буенча карарны депутатлар бертавыштан кабул итте.