Нурлат шәһәре Башлыгы вазифасына Дамир Ишкинеев сайланды
Нурлатта V чакырылыш Нурлат шәһәре Советының беренче сессиясе узды.
Сессия эшендә ТР Экология һәм табигый байлыклар министры Александр Шадриков, ТР Дәүләт Советы депутаты Шамил Яһудин катнашты. Сессияне Нурлат шәһәре Советының өлкән депутаты Александр Собольков алып барды.
Сессия гадәттәгечә Россия Федерациясе һәм Татарстан Республикасы дәүләт гимннарыннан башланды.
Редакция һәм хисап комиссияләре вазыйфалары йөкләнгән секретариатны сайлап, депутатлар көн тәртибен раслады. Ул Татарстан Рәисен, «Татарстан Республикасы Нурлат муниципаль районының Нурлат шәһәре» муниципаль берәмлегенең вәкиллекле органы депутатларын сайлау нәтиҗәләрен, Нурлат шәһәре Башлыгын, Нурлат шәһәре Советы вәкилен Нурлат муниципаль районы Советына сайлау турында һәм башка сорауларны үз эченә алды.
Нурлат шәһәренең Территориаль сайлау комиссиясе секретаре Светлана Растворова Татарстан рәисен һәм шәһәр Советы депутатларын сайлау нәтиҗәләре белән таныштырды. Икенче сорау буенча 19нчы Нурлат-Төньяк бер мандатлы сайлау округыннан шәһәр Советы депутаты, «Бердәм Россия» сәяси партиясенең Нурлат шәһәр Советындагы төркеме әгъзасы Гүзәл Әһлиуллина билгеләп үткәнчә, җирле сәяси совет утырышында шәһәр Башлыгы вазифасына кандидатура сыйфатында Ишкинеев Дамир Азат улы сайланган.
"Һәм бу гаҗәп түгел. Дамир Азат улы җитәкчелегендә бик күп эшләр башкарылды. Безнең шәһәр аеруча үзгәрде. Җирле сәяси совет әгъзалары, шәһәр Советы депутатлар төркеме, бердәмроссиялеләрнең барлык партия активы исеменнән без Нурлат шәһәре Башлыгы вазифасына Ишкинеев Дамир Азат улы кандидатурасын тәкъдим итәбез", - диде ул.
Монда ук экология министры Александр Шадриков чыгыш ясады. Ул нурлатлыларга Татарстан Республикасы Рәисен һәм җирле үзидарәнең вәкиллекле органнары депутатларын сайлау буенча масштаблы сайлау кампаниясен уңышлы уздырганнары өчен рәхмәт белдерде. Ул билгеләп үткәнчә, Татарстан сайлаучыларының 88 проценттан артыгы Татарстан Республикасы Рәисе сайлауларында Рөстәм Миңнеханов өчен тавыш биргән.
«Узган сайлаулар республика җитәкчелеге тарафыннан үткәрелә торган социаль-икътисадый үсеш курсына сайлаучыларыбызның ышанычлы ярдәм итүен, татарстанлыларның республика Рәисе Рөстәм Нургали улы Миңнехановка югары ышанычын күрсәтте», – диде министр.
Александр Шадриков шулай ук билгеләп үткәнчә, шәһәр Башлыгы вазыйфасына сайланганда Дамир Ишкинеев муниципаль берәмлекнең социаль-икътисадый үсешенең иң катлаулы бурычларын уңышлы үти алачак.
"Хөрмәтле депутатлар, Нурлат шәһәре башлыгы вазифасына республика Рәисе исеменнән Дамир Азат улы кандидатурасын хуплавыгызны һәм аны Нурлат шәһәре Башлыгы вазифасына сайлау өчен тавыш бирүегезне сорыйм», – дип мөрәҗәгать итте Александр Шадриков депутатларга.
Башка тәкъдимнәр булмады, шуңа күрә рәислек итүче кандидатларны күрсәтүне туктатырга тәкъдим итте.
Ачык тавыш бирү барышында күпчелек тавыш белән «Нурлат шәһәре» муниципаль берәмлеге Башлыгы итеп Ишкинеев Дамир Азат улы сайланды. Шәһәр Башлыгы ант кабул итте, депутатларга ышанычлары һәм ярдәмнәре өчен рәхмәт белдерде. Аннары көн тәртибендәге мәсьәләләрне депутатлар аның кул астында карады. Биредә ачык тавыш бирү юлы белән шәһәр Советының район Советына вәкиле итеп Нурлат-Тимерьюл бер мандатлы 4нче сайлау округы депутаты Николай Липатов сайланды. Шулай ук бертавыштан аны төп вазифаларын башкару белән беррәттән Нурлат шәһәре Башлыгы урынбасары итеп сайладылар.
Сессия Шәһәр Советының даими комиссияләре һәм «Бердәм Россия» Бөтенроссия партиясе депутатлар төркемен Нурлат шәһәре Советында теркәү турындагы мәсьәләләр буенча фикер алышу белән дәвам итте. Алар буенча карарларны депутатлар шулай ук бертавыштан кабул итте. Сессия тәмамланганнан соң яңа сайланган депутатлар депутат билгеләре алды.