300дән артык нурлатлы "Татарстан кроссы-2025" киң колачлы ярышларында катнашты
«Ак Барс» Спорт үзәге территориясендә «Милләт кроссы» бөтенроссиякүләм йөгерү көне кысаларында оештырылган җиңел атлетика ярышлары узды.
Ярышларны ачып җибәрү тантанасында катнашучыларны район Башкарма комитетының мәгариф бүлеге начальнигы урынбасары Татьяна Тимофеева, «Ледок» спорт мәктәбе директоры Александр Елагин, махсус хәрби операция ветераны Виталий Микуков һәм ярышларның баш хөкемдары Геннадий Герасимов сәламләде. Алар барлык спортчыларга җиңел йөгерү, яхшы кәеф һәм уңышлар теләделәр.
"Барыгызны да йөгерү көне белән котлыйм! Командирым әйтмешли: “Сәламәт тәндә – сәламәт рух". Спорт белән шөгыльләнегез, актив булыгыз, барыгызга да җиңүләр телим», – диде Виталий Микуков. Биредә үк ул спортта алдынгы булган укучыларга ГТО билгеләре тапшырды.
Физик культура укытучылары Андрей Помелов һәм Алексей Тихонов ГТО комплексын популярлаштыруда актив катнашканнары өчен рәхмәт хатлары белән бүләкләнделәр.
Традиция буенча кроссны 2018 елда туган һәм аннан кечерәк катнашучылар ачты. Төрле яшь категорияләрендә 300 метрдан 3 километрга кадәр дистанцияләрдә барлыгы 20дән артык ярыш булды.
Миләүшә Галимова - «Нурлатнефть» нефть-газ чыгару идарәсе ветераны, аңа 65 яшь. Күптән түгел Әлмәт шәһәрендә узган ярыммарафонда 21 чакрым йөгереп, үз яшь категориясендә беренче урынны яулаган. Нурлаттагы ярышлардан да читтә калмый.
«Минем өчен бу көн - бәйрәм, күңелем белән ял итәм, дип тә әйтергә була. Ярышларны яхшы дәрәҗәдә оештырулары өчен рәхмәт», - диде ул старт алдыннан.
Массакүләм йөгерештә катнашучыларның барысы да уңай энергия һәм күтәренке рух туплады. Җиңүчеләр һәм призерлар грамоталар, медальләр һәм призлар белән бүләкләнде. Бүләкләү тантанасы район Башкарма комитеты җитәкчесенең социаль мәсьәләләр буенча урынбасары Әлфия Галәүтдинова катнашында узды.