Урта Чаллы авылында гомер итүче хезмәт ветераны 90 яшьлек юбилеен билгеләп үтә
Нурлат районы Башлыгы исеменнән Максудҗан Хафиз улы Вафинны Нурлат районы Башкарма комитеты җитәкчесенең социаль мәсьәләләр буенча урынбасары вазыйфаларын башкаручы Әлфия Галәүтдинова котлады.
Нурлат районының Урта Чаллы авылында яшәүче хезмәт ветераны Максудҗан Хафиз улы Вафинны котладылар. 90 яшьлек юбилее белән котлауларны ул үзенең җылы өй шартларында кабул итте.
Башкарма комитет җитәкчесенең социаль мәсьәләләр буенча урынбасары вазыйфаларын башкаручы Әлфия Галәүтдинова юбилярга район Башлыгы Дамир Ишкинеев исеменнән котлау хаты һәм истәлекле бүләк тапшырды. Тантанада шулай ук Иске Чаллы авыл җирлеге башлыгы Татьяна Савинова да катнашты.
Максудҗан Хафиз улы - гаҗәеп язмышлы, Бөек хезмәт батырлыгы иясе. Аның тормышы - батырлык, хезмәт сөючәнлек һәм үз җиренә тугрылыкның чын үрнәге ул. Ул 7 яшендә әтисез калып, кечкенәдән эшли башлый. 11 яшендә, мәктәпнең нибары 4 сыйныфын тәмамлагач, әнисенә ярдәм итәр өчен колхозга эшкә керә. Үз гомерендә ул бик күп һөнәрләр үзләштергән: электромонтер, моторист, чөгендер игүче, тракторчы, остаханә мөдире, кочегар булып эшләгән. Аның фидакарь хезмәте берничә тапкыр дәүләт бүләкләренә лаек булган. 1971 елда чөгендер үстерүдә ирешкән уңышлары өчен ул ВДНХның бронза медаленә лаек була, берничә тапкыр социалистик ярышларда җиңүче була, исеме республиканың Хезмәт даны юбилей китабына кертелә.
Юбилярның горурлыгы - аның зур һәм тату гаиләсе. Моннан бер ел элек вафат булган хатыны белән бергә алар 65 ел тату гомер кичергәннәр, дүрт бала тәрбияләп үстергәннәр. Бүген Вафиннар нәселендә - 37 кеше, гаилә башлыгы оныклары Һәм оныкчыкларының кайгыртучанлык һәм игътибарын тоеп гомер итә.
Максудҗан Хафизович бүген дә күңел күтәренкелеген һәм оптимизмны саклый. Ул район җитәкчелегенә котлаулары һәм бүләкләре өчен рәхмәтен белдерде.