«Кормыш» территориаль иҗтимагый үзидарә территориясендә көзге өмәләр дәвам итә
Чираттагы төзекләндерү чарасын алар мәчет территориясендә үткәрде.
Узган ял көннәрендә 8нче «Кормыш» территориаль иҗтимагый үзидарә территориясендә күмәк эш һәм үзара ярдәмләшү атмосферасы хөкем сөрде. Микрорайонда яшәүче актив нурлатлылар чираттагы өмәне үткәрде, бу юлы җирле мәчет территориясен тәртипкә китерделәр. Бу эш зират территориясен җыештырудан башланган көзге зур кампаниянең дәвамы булды.
Аеруча мөһим инициативаларга яшьләрнең торган саен күбрәк кушыла баруы сөендерә. Үсеп килүче буынга мәчет имамы Габделхак Нургали улы Шәяхмәтов һәм микрорайонда яшәүче өлкәннәр үрнәк күрсәтә, алар мондый чараларда һәрвакыт башлап йөрүчеләр булып тора. Аларның битараф булмавы һәм хезмәт сөючәнлеге башкаларны да илһамландыра.
"Әлбәттә, бездә яшьләр өчен яхшы үрнәк бар. Хөрмәтле активистларыбыз - һәрвакыт өмәләрнең беренче рәтләрендә, ә аларга яшьләр дә тартыла", - дип уртаклашты 8нче ТИҮ рәисе Рауза Ханеня.
Төзекләндерү эшләре дәвам итә. Якын киләчәктә ТИҮ активистларының планнары - микрорайонның спорт мәйданчыкларында өмәләр үткәрү.
«Кормыш» территориаль иҗтимагый үзидарәсе барлык битараф булмаган кешеләрне киләсе өмәләргә кушылырга һәм бергәләп микрорайонны тагын да чистарак һәм уңайлырак итәргә чакыра!