Нурлатта Бердәм тавыш бирү көне: 2331нче сайлау участогына халык гаиләләре белән килә
Бердәм тавыш бирү көне Нурлат шәһәренең 2нче мәктәбендә урнашкан 2331нче сайлау участогында Россия һәм Татарстан гимннарын тантаналы рәвештә башкарудан башланды.
Иртә булуга карамастан, үз гражданлык бурычын иртәдән үк үтәргә теләгән беренче актив сайлаучылар ишек төбенә җыелган иде инде.
Әлеге участок Нурлат районында иң зурларның берсе санала –биредә 2535 сайлаучы исәпләнә. Үзәктә урнашуы аны шәһәр халкы арасында аеруча популяр итә.
Участок сайлау комиссиясе рәисе Галина Грачева әзерлекнең югары булуын билгеләп үтте. "Сәламәтлеге торышы яисә башка сәбәпләр аркасында участокка килә алмаган сайлаучылар өчен өйдә тавыш бирү оештырылды. Комиссия әгъзалары адреслар буенча сәгать 10:00нан чыга башлаячак. Тавыш бирүгә гаризалар өйдә телефон аша 14:00 сәгатькә кадәр кабул ителәчәк», – дип аңлатты Галина Петровна.
Участокта иртәдән бирле җанлы атмосфера хөкем сөрә. Калган көнен эшкә яки шәхси эшләренә багышларга ниятләүчеләр активлык күрсәтә. Бигрәк тә нурлатлыларның күпчелеге сайлауларга гаиләләре белән килүе күңелне нечкәртә торган традиция булып тора.
Ачык мисал-Корниловлар гаиләсе. Елена Николаевна һәм Сергей Алексеевич инде 30 ел бергә һәм бу еллар дәвамында сайлау участокларына һәрвакыт бергә киләләр. "Безнең өчен бу яхшы традиция. Бездә беркайчан да сайлауларга барыргамы, юкмы дигән сорау тумый. Бу безнең гражданлык бурычыбыз һәм без һәрвакыт бергә гамәлгә ашыра торган хокукыбыз», – дип уртаклаша ир белән хатын.
2331нче сайлау участогы кичке 20:00 сәгатькә кадәр эшләячәк. Комиссия әгъзалары барлык гражданнарга уңайлы һәм ашыкмыйча тавыш бирергә мөмкинлек бирергә әзер.