“Нурлат йолдызлыгы" балалар бәйрәме белән изге эшләр эстафетасын башлап җибәрде
Бәйрәм Ленинград урамындагы күпфатирлы йортлар ишегалдында узды.
«Нурлат йолдызлыгы» коммерцияле булмаган автоном оешмасы балалар өчен күңелле хәйрия бәйрәмен үткәрде. Чара Ленинград урамындагы 1нче һәм 3нче йортлар ишегалдында, быел җәй көне «Татнефть» компаниясе гранты ярдәмендә төзелгән заманча яңа балалар мәйданчыгында узды. Бу ишегалды бик үзгәргән: элек уен инфраструктурасы булмаган урыннарда хәзер төрле яшьтәге балалар өчен төрле төстәге уен комплекслары урнаштырылган.
Чараның программасы бай һәм мавыктыргыч иде. Профессиональ аниматор балаларны күңелле уеннарга һәм конкурсларга җәлеп итте. Гигант куыклар белән сабын тамашасы балаларда аеруча соклану уятты. Оештыручылардан бүләк - һәр катнашучыга баллы, татлы мамык таратылды. “НурлатЙорт" идарә компаниясе балалар өчен шулай ук татлы бүләкләр дә әзерләде.
"Элегрәк без «Курше Фест» республика проекты кысаларында төрле яшьтәге нурлатлылар өчен өч ишегалды бәйрәме үткәргән идек инде. Яңа уку елы башлану белән махсус балалар өчен хәйрия чарасы оештырырга булдык, – дип билгеләп үтте «Нурлат йолдызлыгы» КАО оештыручысы Резеда Гиняева. – Бу бәйрәм белән без гомумшәһәр игелекле эшләр эстафетасына старт бирәбез. Безнең инициативаны коммерцияле булмаган башка оешмалар да күтәреп алыр дип өметләнәбез. Кушылырга теләүчеләрнең беренчеләре бар инде, мәсәлән, «Барысы да җиңү өчен. Нурлат» иҗтимагый оешмасы.
Бәйрәм дистәләгән гаиләне җыйды. Балалар мәйданга дуслары, әти-әниләре, әби-бабайлары белән килде. Бу чара күршедәге 7нче йортта яшәүче Каблуковлар гаиләсенә дә ошаган.
"Балалар бик шат! Бу мәйданчыкта без бәйрәмне беренче тапкыр билгеләп үтәбез. Балалар аниматор белән дә уйнадылар, татлы мамык та ашадылар, башка балалар белән дә аралаштылар. Оештыручыларга безнең ишегалдына шундый бүләк өчен зур рәхмәт», - дип тәэсирләре белән уртаклашты Светлана Каблукова.
Бәйрәм балалар өчен якты вакыйгага гына түгел, ә Нурлатта яңа традиция – изге эшләр эстафетасына нигез салган мөһим социаль адымга да әверелде.