Татарстан Журналистлар берлегенең Нурлат бүлеге сафлары яңа әгъзалар белән тулыланды
«Күрше-фест» фестивале кысаларында аларга әгъза булуларын раслаучы билетларны тапшыру тантанасы узды.
Нурлатта район медиаберләшмәсе өчен мөһим вакыйга булды — Татарстан Республикасы Журналистлар берлегенең җирле бүлекчәсе сафлары 7 яңа әгъза белән тулыланды. Әгъзалык билетларын тапшыру тантанасы «Күрше – фест» республика фестиваленең «Күршеләр - иң якын кешеләр» проектының йомгаклау чарасы кысаларында узды. Нурлат муниципаль районы башлыгы Дамир Ишкинеев актив фикердәшләргә әгъза булуларын раслаган билетларны тапшырды.
Журналистлар берлегенең Нурлат бүлеге республикада иң актив һәм уңышлы эшләүче, районның иҗади көчләрен ышанычлы берләштерүче иҗтимагый оешмаларның берсе. Соңгы вакытта оешма составы сизелерлек киңәя бара, бу һөнәрнең абруе һәм медиа иҗатка кызыксынуның үсүе турында сөйли. Үзләрен фикердәшләр һәм талантлы авторлар буларак күрсәткән яңа 7 якташыбыз профессиональ бергәлек сафларына керергә теләк белдерде. Журналистлар берлеге составына Андриан Григорьев, Фәүзия Мөхәммәтова, Люзия Вәлиуллина, Әлфия Гомәрова, Гөлүсә Нугаева, Мәликә Яхина һәм Александр Арзамасцев кушылды.
Журналистлар берлегенең Нурлат бүлеге матбугат һәм массакүләм коммуникацияләр хезмәткәре Резеда Гиняева җитәкчелегендә төрле юнәлешләр буенча күпкырлы эш алып бара: район халкы арасында патриотик конкурслар оештыра, шагыйрьләр һәм иҗат коллективлары белән актив хезмәттәшлек итә, шулай ук матбугат ветераннары истәлеген мәңгеләштерү буенча зур эш башкара.
"Бүген безнең җирле бүлекчә 21 нурлатлыны берләштерә. Оешманы яңа кадрлар белән тулыландыру безнең эшчәнлекне тагын да югарырак дәрәҗәгә күтәрергә мөмкинлек бирәчәк. Безнең сафларга шундый мавыктыргыч һәм иҗади кешеләрне кабул итү безнең өчен зур мәртәбә. Аларның һәркайсының үз уникаль тәҗрибәсе һәм яңа карашы бар, алар безгә проектларыбызны тагын да кызыклырак итәргә ярдәм итәчәк. Бергәләп бик күп якты идеяләрне тормышка ашыра алуыбызга һәм журналист исемен лаеклы рәвештә алып баруны дәвам итәчәгебезгә чын күңелдән ышанам», – дип билгеләде Резеда Акрамовна.