9нчы мәктәпнең беренче сыйныфына баручы 73 укучы өчен беренче кыңгырау яңгырады
Нурлат гимназиясе ишегалдында сентябрь аеның якты кояшы астында үзенчәлекле бәйрәм рухы хөкем сөрә.
Бирегә шәһәрнең 9нчы мәктәбе укучылары, аларның әти-әниләре һәм педагоглары җыелган иде. Алар өчен быел беренче кыңгырау бәйрәме кунакчыл гимназиядә узды, үз мәктәпләре капиталь ремонтка ябылды.
Бу истәлекле көнне хөрмәтле кунаклардан иң җылы котлаулар һәм теләкләр яңгырады. Тантанада катнашучыларга район башлыгы Дамир Ишкинеев изге теләкләр белән мөрәҗәгать итте. Ул укучыларга яңа уку елында белем алырга, тырышып укырга, яңа биеклекләрне яуларга һәм бөек Ватаныбызның чын патриотлары булып үсүләрен теләде.
"Белем көне сезнең өчен гадәти булмаган шартларда уза – сезнең туган мәктәбегездә түгел, ә монда, гимназиядә, чөнки әлеге ремонт эшләре бара. Бүгенге көндә түбә ремонтланып бетте, эчке эшләр дәвам итә. Якын арада җитешсезлекләрне бетереп, сез үз мәктәбегезгә кайтырсыз дип өметләнәбез", - дип мөрәҗәгать итте Дамир Ишкинеев укучыларга, аларның әти-әниләренә һәм укытучыларына.
Бүләкләү тантанасы бәйрәмгә аеруча зур мәртәбә өстәде. «Татнефть»нең Нурлат районы буенча социаль программаларны гамәлгә кую үзәге җитәкчесе урынбасары Ришат Сафиуллин укудагы һәм интеллектуаль эшчәнлектәге зур уңышлары өчен «Татнефть» хәйрия фондыннан сертификатлар тапшырды. Бүләккә 8 сыйныф укучысы Хәмзә Фаддо – гарәп теле буенча төбәк олимпиадасының йомгаклау этабында җиңүче, шулай ук инглиз теле укытучысы Гүзәл Моратова лаек булды.
9нчы мәктәп директоры Гөлнара Исхакова укучыларны, педагогик коллективны һәм ата-аналарны яңа уку елы башлануы һәм Белем көне белән котлады.
Ул ихластан: «Безнең мәктәп «Иң яхшы ашханә-2025» Бөтенроссия конкурсының республика этабында «Шәһәр мәктәбенең иң яхшы ашханәсе» номинациясендә мактаулы өченче урынны алды. Сезне әлеге лаеклы җиңүебез белән котлыйм!»,-дип шатлыклы яңалык белән уртаклашты.
Гөлнара Исхакова шулай ук 9В сыйныфы укучысы Арина Мальцевага җәйге каникулларда намуслы хезмәте һәм үрнәк тәртибе өчен грамота тапшырды.
Бәйрәмнең кульминациясе, һичшиксез, зур юлның башлану символы – кыңгырау чыңы булды. Аны шалтырату хокукын 11нче сыйныф укучысы Амир Алкурдига һәм беренче сыйныф укучысы Василиса Вознякка бирелде. Ә иң кечкенә укучыларның күңелгә үтеп керерлек шигырьләре һәм балкып торган күзләре белән чыгышлары линейканың матур йомгагы булды. Күптәнге күркәм традиция буенча, чыгарылыш сыйныф укучылары беренче сыйныф укучыларын тантаналы рәвештә яңа сыйныфларына озатты, алар өчен гаҗәеп белем дөньясы ишекләре ачылды.
Яңа уку елында 9нчы мәктәптә 803 укучы белем алачак. Аларның 73е өчен бу көн үзенчәлекле булды – беренче кыңгырау чыңы тормышларында иң мавыктыргыч сәяхәт башлануын хәбәр итте.