Нефть тармагы ветеранына Нурлатның мактаулы гражданины исеме бирелде
Нурлат муниципаль районы башлыгы Дамир Ишкинеев район һәм шәһәр хезмәтләре җитәкчеләре белән киңәйтелгән планерка үткәрде.
Планерканың көн тәртибе бик бай – якын арада булачак мөһим сәяси вакыйгалар турында чыгышлар да булды. 2025 елның сентябрендә узачак сайлауларны, аларга әзерлек һәм үткәрү турында район башлыгы урынбасары Иван Захаровны тыңладылар.
Киләсе кышкы җылылык бирү чорына әзерлек, агымдагы елның беренче яртыеллыгында экологик чаралар, объектларны файдалануга тапшыру, узган ел йомгаклары һәм мәктәпләрнең яңа уку елына әзерлеге, ГИА нәтиҗәләре, «Мәктәпкә җыенырга ярдәм ит» акциясе, балаларны җәйге савыктыру кампаниясе йомгаклары, инвалидларны, ОВЗлы затларны һәм балигъ булмаганнарны эшкә урнаштыру турында сөйләштеләр. Татарстан Республикасы көне, Шәһәр көне һәм Нефтьчеләр көне уңаеннан үткәрелгән бәйрәм чараларында район Башкарма комитеты җитәкчесе Әсгать Габдуллин һәм аның урынбасарлары чыгыш ясады.
Киңәшмәдә массакүләм халык катнашкан бәйрәм чараларына әзерлек һәм уздыру чорында хокук тәртибен һәм куркынычсызлыкны тәэмин итү мәсьәләләренә аерым игътибар бирелде.
Докладчыларны тыңлап, район башлыгы Дамир Ишкинеев конкрет йөкләмәләр бирде.
Киңәйтелгән планерка бүләкләү белән тәмамланды. Намуслы хезмәте, Нурлат районы һәм Нурлат шәһәренең социаль-икътисади үсешенә зур өлеш кертүе өчен, шулай ук юбилее уңаеннан «Нурлат муниципаль районы һәм Нурлат шәһәренең Мактаулы гражданины» исеме күп еллар «Нурлатнефть» нефть-газ чыгару идарәсендә баш инженер булып эшләгән Риф Әхтәм улына Сафиуллинга бирелде.
Биредә Нурлат районы буенча ведомстводан тыш сак бүлеге начальнигы Илназ Габделвәлиевны туган көне белән котладылар, район Башкарма комитетының эшләр идарәчесе Ралия Ханиевага, район Советының кадрлар белән тәэмин итү секторы баш белгече Лилия Сатдаровага дәүләт учреждениеләре хезмәткәрләре профсоюзы Республика комитетының Мактау Грамоталарын тапшырдылар.