Нурлатта “Музыка” скверын “Җәйге төсләр” бизәде
Кичә “Сәләт” балалар сәнгать мәктәбе янәшәсендәге “Музыка” скверында “Татарстанда – җәй” республика проекты кысаларында оештырылган “Җәйге төсләр"дип исемләнгән матур чара узды.
Яшь нурлатлылар һәм аларның әти-әниләре иҗат, музыка һәм ваемсыз күңел ачу атмосферасына чумдылар.
Бәйрәм программасы чын мәгънәсендә бай булды: балалар күңелле флешмобта бик теләп катнашты, караоке-баттлда вокаль талантларын күрсәтте һәм тылсымлы сабын куыклары тамашасын сокланып күзәтте. Конфетти белән дискотека аеруча шау-шу тудырды, анда кечкенә биючеләр рәхәтләнеп күңел ачты.
Әти — әниләр дә читтә калмады - «Ата-аналар балаларга каршы» күңелле эстафеталарында чын спорт дәрте хөкем сөрде, һәрвакыттагыча, дуслык җиңде! Ә аквагрим осталары бәйрәмдә катнашучылар өчен матур образлар тудырды, чарага буяулар һәм яхшы кәеф өстәде.
«Сәләт» балалар сәнгать мәктәбе бу искиткеч проектка шатланып кушылды, - дип уртаклашты мәктәп директоры Валентина Борһанова. - Без шәһәрдәшләребезне яраткан бакчабыздагы матур вакыйгалар белән сөендерүне дәвам итәбез, һәм августта безне тагын да күбрәк бәйрәмнәр көтә! Афиша чыкты инде-барысын да кунакка көтәбез!»
«Безгә мондый бәйрәмнәр уздырылуы бик ошый. Без сәнгать мәктәбе уздырган бер генә чараны да калдырмаска тырышабыз. Бигрәк тә улыма эстафеталар һәм сабын куыклары тамашалары ошады. Оештыручыларга һәм республика җитәкчелегенә "Татарстанда - җәй" проекты өчен рәхмәт! »,- дип уртаклашты улы Рафил белән килгән Рузилә Рәхимова.
«Татарстанда - җәй» проекты гаиләләрне берләштерүче һәм балаларның каникулларын онытылмас тәэсирләр белән тутыручы күркәм традициягә әверелде. Нурлатта чаралар программасы куандыра бара - һәр көнне шәһәр паркларында һәм скверларында конкурслар, концертлар һәм иҗади остаханәләр уза.