Нурлатта коррупциягә каршы көрәшне координацияләү комиссиясе утырышы узды
Нурлат районында коррупциягә каршы көрәш эшен координацияләү комиссиясенең агымдагы елның 2нче кварталындагы эше Нурлат районы башлыгы Дамир Ишкинеев җитәкчелегендә барды.
Биредә район башлыгының коррупциягә каршы көрәш мәсьәләләре буенча ярдәмчесе Рәфис Нигъмәтуллин «2015-2027 елларга Нурлат муниципаль районының коррупциягә каршы сәясәтен гамәлгә ашыру» муниципаль программасын гамәлгә ашыруның барышы турында сөйләде. Мәдәният өлкәсендә коррупция күренешләренә юл куймау чаралары һәм коррупциягә каршы агартуны профилактикалау эше турында «Мәдәниятне үстерү үзәге» МБУ башлыгы вазифаларын башкаручы Светлана Мизонова сөйләде.
Утырышта шулай ук район Башкарма комитетының торак сәясәте һәм коммуналь хуҗалык бүлеге башлыгы Наталья Долгованың районда тормышка ашырыла торган барлык программалар буенча, шул исәптән республика грантлары һәм торак төзелешенә субсидияләр алганда, исәпкә кую һәм торак бүлеп бирү барышында коррупция куркынычларын кисәтү эшен оештыру турындагы мәгълүматын тыңладылар. Аннары теманы социаль яклау бүлеге башлыгы Елена Афанасьева дәвам итте. Ул халыкны социаль яклау, гражданнарга социаль түләүләр рәсмиләштерү өлкәсендәге эш нәтиҗәләре, шул исәптән муниципаль районның социаль өлкә учреждениеләре тарафыннан халыкка дәүләт социаль хезмәтләре күрсәтү системасын камилләштерү турында сөйләде.
Утырышта хокук саклау органнары, прокуратура, районның җирле үзидарә органнары, муниципаль бюджет учреждениеләре җитәкчеләре, җирлек башлыклары, массакүләм мәгълүмат чаралары вәкилләре катнашты.
Нурлатта наркотикларга каршы көрәш комиссиясе утырышында профилактика мәсьәләләре каралды
Наркотикларга каршы көрәш комиссиясе утырышы Нурлат районы башлыгы Дамир Ишкинеев җитәкчелегендә узды.
Утырышның көн тәртибенә берничә мәсьәлә кертелгән иде. Башта комиссия секретаре Александр Ханеня комиссиянең алдагы утырышы беркетмәсенең үтәлеше турында хәбәр итте.
Аннары гомуми белем бирү учреждениеләрендә һәм һөнәри белем бирү оешмаларында укучылар арасында наркотик һәм психотроп препаратлар кулланучы балигъ булмаганнарны ачыклау һәм исәпкә алу мәсьәләләре буенча профилактик эш алып баруда үзара хезмәттәшлек итү турында район Башкарма комитетының мәгариф бүлеге начальнигы Алсу Рәхмәтуллина һәм аграр техникум директоры Алевтина Граф чыгышын тыңладылар.
Массакүләм - мәгълүмат чараларында наркоманияне профилактикалау эшен оештыру турында «Татмедиа»ның «Нурлат - информ» филиалы җитәкчесе - баш мөхәррир Сирень Сәмерханова сөйләде.
Биредә үк Россия Эчке эшләр министрлыгының Нурлат районы буенча Эчке эшләр бүлегенең җинаятьчеләрне эзләү бүлеге өлкән оперуполномоченные Станислав Гнусаревның наркотиклы үсемлекләрне үстерү урыннарын ачыклау, аларны бетерү буенча күрелә торган чаралар, аларны культивацияләүгә юл куймау һәм район территориясендә законсыз әйләнешкә кертү турында мәгълүматны тыңладылар.