Нурлат үзәк район хастаханәсендә эндокрин авыруларны профилактикалауның мөһимлеген искә төшерделәр
Нурлат район үзәк хастаханәсендә эндокрин системасы авыруларын профилактикалау буенча актив эш дәвам итә. Сырхауханә хезмәткәрләре даими рәвештә пациентлар белән калкансыман бизнең эшчәнлеге бозылу белән бәйле авыруларның симптомнары, куркынычлары һәм кисәтү ысуллары турында хәбәрдарлыкны арттыруга юнәлдерелгән мәгълүмати-аңлату эшләре алып баралар.
Чираттагы профилактика акциясе поликлиниканың эндокринология кабинетында узды. Шәфкать туташы пациентларга шикәр диабеты, аутоиммун тиреоидит (АИТ) һәм гипотиреоз билгеләре турында файдалы мәгълүмат булган мәгълүмати буклетлар тараткан, шулай ук килүчеләр белән әңгәмә үткәргән. Очрашу барышында сәламәт туклану, физик активлык һәм даими тикшерүләрнең мөһимлеге мәсьәләләре буенча фикер алыштылар.
Белгечләр билгеләп үткәнчә, профилактика — эндокрин авыруларны иртә ачыклау һәм уңышлы контрольдә тоту ачкычы ул.
Быел гына Нурлат районында:
шикәр диабетының 82 очрагы,
аутоиммун тиреоидитның (АИТ)16 очрагы,
гипотиреозның 15 очрагы теркәлгән.
Табиблар сүзләренчә, күп пациентлар үз авырулары турында беренче тапкыр нәкъ менә шундый профилактик чаралар вакытында белә. Кандагы шикәр күләмен даими үлчәү, тән массасын һәм калкансыман бизнең торышын контрольдә тоту сәламәтлектә булган тайпылышларны вакытында ачыкларга һәм дәвалауны иртә стадияләрдә башларга мөмкинлек бирә.
Нурлат үзәк район хастаханәсе халыкта үз сәламәтлеге турында кайгырту формалаштыруга юнәлдерелгән шундый акцияләр үткәрүне дәвам итәчәк. Табиблар искә төшерә: беренче җитди симптомнарны көтәргә кирәкми - авыруны кисәтү авыруның катлаулануларына каршы көрәшүгә караганда җиңелрәк.