Нурлатта СВОда катнашучылар 9 Майга багышланган бәйрәм чараларының мәртәбәле кунаклары булды
Нурлат районында 9 Майда Бөек Ватан сугышында Җиңүнең 80 еллыгына багышланган тантаналы чаралар узды.
Бу көнне махсус хәрби операциядә катнашучыларга һәм һәлак булган хәрбиләрнең гаиләләренә аерым игътибар бирелде.
Хәзерге заман геройлары һәм һәлак булган сугышчыларның туганнары өчен оештыручылар бәйрәм чәй өстәлләре әзерләде, җылылык һәм игътибар атмосферасы тудырды. Аларны Җиңү көне белән котларга Нурлат районы Башлыгы Дамир Ишкинеев, ТР Экология һәм табигый байлыклар министры Александр Шадриков, шулай ук шәһәр һәм район хәрби комиссары Заһир Абдуллин һәм башкалар килде.
Хакимият вәкилләре үз чыгышларында буыннар бәйләнешен ассызыклады, Бөек Ватан сугышы елларында Ватанны саклаучыларның батырлыклары хәзерге сугышчыларның батырлыгында дәвам итә, дип билгеләп үтте.
"Бүген без ветераннарны гына түгел, илебезнең тынычлыгы һәм иминлеге сагында торучыларны да хөрмәтлибез. Сезнең ныклыгыгыз – безнең барыбыз өчен дә лаеклы үрнәк», - дип мөрәҗәгать итте СВО катнашучыларына Дамир Ишкинеев.
Александр Шадриков һәм Заһир Абдуллин һәлак булган хәрбиләрнең гаиләләренә рәхмәт белдерде, аларның югалтулары игътибарсыз калмаячагын, ә геройлар турындагы истәлекләр якташларының йөрәкләрендә яшәячәген ассызыклады.
Бәйрәмдә яшь хәрбиләр гаиләсе дә аеруча дулкынланып катнашты.
"Үз ялымны Нурлатта Җиңү көненә туры килерлек итеп махсус планлаштырдым. Кара диңгез флотында «Кырым» оператив-тактик төркемендә хезмәт итәм. Минем хатыным Александра да гамәлдәге хәрби хезмәткәр, шулай ук Кара диңгез флотында элемтә бүлекчәсендә хезмәт итә",-дип билгеләде Сова-19 позывныйлы сугышчы. Бәйрәмгә алар кечкенә улы Матвей белән килгән.
Нурлатта Җиңү көне бердәмлек, тарихка хөрмәт һәм бүген тыныч күкне саклаучыларга ярдәм символына әверелде.