Нурлатта 1 Май бәйрәмен күңелле итеп билгеләп үттеләр
1 майда Нурлатта аерым бәйрәмчә кәеф хөкем сөрде: шәһәрдә Яз һәм Хезмәт бәйрәменә багышланган масштаблы чаралар узды.
Традицион Беренче май йөреше, иң яхшы колоннага конкурс, шулай ук төрле яшьтәге кешеләр өчен төрле күңел ачу программасы һәм мастер-класслар оештырылды.
Тантананы Нурлат районы Башлыгы Дамир Ишкинеев ачып җибәрде, ул нурлатлыларны һәм шәһәр кунакларын бәйрәм белән котлады. Үз чыгышында ул хезмәтнең, бердәмлекнең мөһимлеген һәм район үсешенә һәр кешенең керткән өлешен ассызыклады. "Беренче Май - бердәмлек һәм хезмәт кешесенә хөрмәт символы. Барыгызга да сәламәтлек, яңа казанышлар һәм туган ягыбызга чәчәк атуын телим", - диде Дамир Азат улы.
Бәйрәм йөрешендә йөзләгән кеше катнашты: предприятие хезмәткәрләре, педагоглар, медицина хезмәткәрләре, студентлар, мәктәп укучылары һәм иҗтимагый оешмалар вәкилләре. Шарлар, флаглар һәм тематик плакатлар белән бизәлгән колонналар шәһәрнең үзәк мәйданы буйлап үтте. Ачык төсләрдәге костюмнар, иҗади номерлар һәм бердәм лозунглар кабатланмас атмосфера тудырды.
Йөрештән соң төп мәйданда бәйрәм программасы башланды. Кунаклар алдында балалар иҗат коллективлары, районның үзешчән артистлары чыгыш ясады, интерактив уеннар һәм бию флешмоблары уздырылды. Балалар һәм өлкәннәр тематик мастер-классларда бик теләп катнашты.
"Безнең шәһәрдә мондый вакыйгаларның буыннарны берләштерүенә бик шатбыз. Мастер-класслар гаҗәпләндерде-үзебез эшләп карадык, килеп чыкты!"- дип хис-кичерешләре белән уртаклаштылар Бикмуллиннар, бәйрәмгә алар гаиләләре белән килгән.
Биредә үк «Театраль» скверы сәхнәсендә район Башлыгы Нурлат янгын сүндерүчеләрен Мактау грамоталары белән билгеләп үтте, аларны кичә билгеләп үтелгән янгыннан саклау көне белән котлады.
Оештыручылар беренче майны якты һәм истә калырлык итүгә ярдәм итүчеләргә рәхмәт белдерде, ә халык социаль челтәрләрдә фотографияләр һәм хис-кичерешләр белән теләп уртаклашты.