Нурлат укучылары “Экояз-2025" марафонына кушылды
Нурлат шәһәрендә ел саен үткәрелә торган «Экояз» экологик акциясе дәвам итә, ул быел Бөек Җиңүнең 80 еллыгына багышлана.
Татарстанда 1 апрельдән «ЭКОяз – 2025» эко-марафоны уза, ул Рөстәм Нургали улы Миңнеханов күрсәтмәсе нигезендә үткәрелә һәм «Экологик иминлек» милли проектына ярдәм йөзеннән үткәрелә. Акция гадәттәгечә санитар-экологик икеайлык белән бергә старт ала.
Елдан - ел табигатьне саклауда мөһим хәрәкәткә шәһәр һәм районда яшәүчеләрнең күбесе кушылып, туган җиребез турында кайгырту күрсәтә.
Нурлат шәһәренең 1нче мәктәбе укучылары эко-марафонга актив кушылды. Агач-куаклар утыртуга багышланган акциянең өченче атнасы аеруча уңышлы узды: балалар ишегалларына һәм йорт яны участокларына яшь агачлар утыртты.
Мәктәп укучыларының бу игелекле гамәле - районның экологик иминлегенә өлеш кертү генә түгел, ә Җиңүнең юбилей елына символик ишарә дә. Утыртылган агачлар киләчәк буыннар өчен табигатьне саклауның мөһимлеген искәртеп торган һәйкәл булачак.
“ЭКОяз" тагын бер мәртәбә шуны исбат итә: кечкенә генә, әмма бердәм тырышлык та безнең төбәкне яшелрәк һәм чистарак итәргә сәләтле. Экологик эстафетаны яшьләрнең, әйләнә-тирә мохиткә сакчыл караш традицияләрен үзләштереп, эләктереп алуы аеруча кыйммәтле.
Барыгызны да әлеге акциягә актив кушылырга чакырабыз!