Түбән Нурлатта «Җырлар да көрәште...» дип исемләнгән патриотик фестиваль узды
Фестиваль халык, сәнгать һәм патриотизм бердәмлеге үрнәгенә әверелде, хәтта катлаулы заманнарда да иҗатның йөрәкләрне берләштерүен һәм яхшылыкка ышанычны ныгытуын исбатлады.
Ватанны саклаучылар елы һәм Бөек Ватан сугышында Җиңүнең 80 еллыгы кысаларында Нурлат районында «Җырлар да көрәште...» хәйрия фестивальләре циклы дәвам итә. Проектның чираттагы, инде дүртенче чарасы Түбән Нурлатның «Нур» татар мәдәнияте үзәгендә узды.
Концерт башланыр алдыннан кунакларны буыннар элемтәсенә багышланган тематик стендлар һәм җирле волонтерлык хәрәкәтләре күргәзмәләре каршы алды. Чарада катнашучылар Түбән Нурлат микрорайонындагы һәм Якты Күл авылындагы мәдәният учреждениеләренең үз ихтыярлары белән ярдәмгә ашыгучылар инициативалары тарихы белән таныша алдылар, шулай ук солдат боткасы һәм кайнар чәйдән дә авыз иттеләр.
Фестивальдә булган һәр микрорайон кешесе махсус хәрби операциядә катнашучыларга ярдәм итүгә үз өлешен кертте. Күбесе гаиләләре белән килде, тамашачылар арасында яшь буын вәкилләре дә күп иде. Мәдәният үзәге директоры Фирүзә Бикташова билгеләп үткәнчә, җирле бергәлек сугышчыларның гаиләләренә актив ярдәм итә. "Безнең халык волонтерлык эшчәнлегендә, сугышчыларга гуманитар ярдәм җыюда бик актив катнаша. Һәм бүген фестивальнең һәр кунагы уртак эшкә үз өлешен кертте – иҗади чыгышмы ул, ирекле ярдәмме яки иганәме. Без бергәләп җиңүне якынайтабыз", - диде ул.
Концерт программасы район артистларын, татар халык театрында катнашучыларны, «Эсперанса» хореография коллективын, яшь укучыларны, вокалистларны һәм башкаларны берләштерде. Сәхнәдә төрле чорлардагы сугыш җырлары, батырлык турында шигырьләр яңгырады һәм патриотик рухтагы биюләр булды.
Кичәнең кульминациясе кыска вакытлы ялга кайткан якташыбыз – СВОда катнашучы Роберт Мөхәммәтҗановның чыгышы булды. Ул «СВОга ярдәм иткән өчен» медален операциянең беренче көннәреннән үк сугышчыларга ярдәмне координацияләүче «Түбән Нурлат» ТИҮ җитәкчесе Айрат Гәрәевка тапшырды. Моннан тыш, Роберт хәрбиләрнең әниләренә һәм хатыннарына истәлекле бүләкләр тапшырды, аларга ныклыклары һәм ярдәмнәре өчен рәхмәт белдерде.
«Җырлар да көрәште...» чаралар циклы дәвам итә: 15 апрельдә эстафетаны Чияле Алан авыл клубы кабул итәчәк. Шәһәр Мәдәният сарае директоры Рөстәм Сәлахов сүзләренә караганда, проект кысаларында барлыгы 19 концерт уздыру планлаштырылган, ә йомгаклау гала-концерты 6 майда шәһәр Мәдәният Сараенда узачак. Җыелган акчалар СВО катнашучылары ихтыяҗлары өчен пилотсыз очкычларга каршы көрәш чараларын сатып алуга тотылачак.