Татарстанда учак ягу һәм урманда мангаллар куллану тыела

2025 елның 14 апреленнән 11 маена кадәр Татарстанда янгынга каршы махсус режим гамәлдә булачак, аның кысаларында республика халкына урман белән янәшә урнашкан җир кишәрлекләрендә мангалларда учак ягу һәм ризык әзерләү тыела. Тиешле карарны ТР премьер-министры Алексей Песошин имзалады.

Режим гамәлдә булган чорда түбәндәге гамәлләр тыела:

• Учаклар ягу, көнкүреш калдыклары, коры үлән һәм чүп-чар яндыру.

• Балалар лагерьлары территорияләрендәге, шулай ук урманнар белән чиктәш участоклардагы мангалларда һәм мичләрдә ачык ут куллану. Ресторан һәм кафе кебек җәмәгать туклануы объектлары искәрмә булып тора.

• Фейерверклар, Бенгал шәмнәре һәм петардаларны да кертеп, I-III куркыныч класслы пиротехник эшләнмәләрне куллану.

• Янучан материаллардан идарә ителми торган әйберләр эшләтеп җибәрү.

Муниципаль район Башлыкларына торак пунктларда вакытлыча янгынга каршы постлар булдыру, урман янгыннарына дучар булган торак пунктлар тирәли минераллаштырылган саклагыч полосалар салуны төгәлләү, шулай ук урманнарны ауган агачлардан һәм корыган үсемлекләрдән чистарту йөкләнде.

Махсус режим гамәлдә булган чорда янгын куркынычсызлыгы таләпләрен бозу җитди штрафларга китерергә мөмкин. Гражданнар өчен алар 10 меңнән 20 мең сумга кадәр, вазыйфаи затлар өчен — 30 меңнән 60 мең сумга кадәр, эшмәкәрләр өчен — 60 меңнән 80 мең сумга кадәр, ә юридик затлар өчен — 400 меңнән 800 мең сумга кадәр тәшкил итә.

Татарстан Республикасы Министрлар Кабинетының «Татарстан Республикасы территориясендә янгынга каршы махсус режим кертү турында» 2025 елның 10 апрелендәге 212 номерлы карары