Нурлатта катнашучыларга ярдәм йөзеннән хәйрия концерты узды
катнашында узган концертта 103 мең сумнан артык акча җыелган.
Кичә Нурлат шәһәренең Мәдәният сарае патриотик бердәмлек үзәгенә әверелде. Биредә танылган якташларыбыз – Татарстанның атказанган артистлары Сиринә Зәйнетдинова, Рөстәм Насыйбуллин һәм кыска вакытлы ялда булган махсус хәрби операциядә катнашучы сугышчы, батальон командиры Альберт Мөхәммәтов оештырган хәйрия концерт узды. Чарада 103 мең сумнан артык акча җыелды, ул Нурлат сугышчылары өчен кирәкле әйберләр сатып алу өчен волонтерларга тапшырылачак.
Альберт Мөхәммәтов концертка аеруча эмоциональ кәеф бирде. Аның башкаруында рус һәм татар телләрендә хәрби-патриотик композицияләр яңгырады, аларны зал аягүрә басып күтәреп алды.
Күренекле җырчылар Сиринә Зәйнетдинова һәм Рөстәм Насыйбуллин популяр җырлар программасын тәкъдим итте. Нурлатлыларга җирле шагыйрә Сәкинә Хәйруллина сүзләренә Рөстәм Насыйбуллин башкаруындагы җырның премьерасы да ошады. Волонтерларның риясыз ярдәме турындагы дулкынландыргыч юлларны тамашачылар алкышларга күмде.
Кичә барышында Альберт Мөхәммәтов һәм «Сугышчан туганлык» иҗтимагый оешмасы җитәкчесе Зиннур Мотаһиров волонтерлык эшчәнлегендә актив катнашкан нурлатлыларга «СВОга ярдәм иткән өчен» медальләрен, шулай ук 29657нче хәрби частьтән Рәхмәт хатларын тапшырды.
Чара ахырында Нурлат районы Башлыгы Дамир Ишкинеев чираттагы хәйрия акциясенә көчләреннән килгәнчә өлеш керткән артистларга һәм тамашачыларга зур рәхмәт сүзләрен җиткерде. Вакыйга истәлеге итеп артистларга рәхмәт хатлары һәм истәлекле бүләкләр тапшырды.
Концерт нурлатлыларның заман каршылыклары алдында бердәм була белүләрен күрсәтте. Җыелган акчалар волонтерларга тапшырылды инде, алар СВО катнашучыларына ярдәмгә җибәреләчәк.