Сезон Кубоктан башланды

Узган атнада районда волейбол сезонына рәсми старт бирелде.  Быел сезон Кубок турниры белән башланып китте. 

– Гадәттә, Кубок өчен уеннар беренчелектән соң гына була иде, әмма быел тәртипне үзгәртергә булдык. Волейболчылар да, оештыручылар да сезонны конкрет трофей өчен көрәш белән башлап җибәрү ягында иде, – дип аңлатты быелгы сезонның үзенчәлеген Кубок турнирының баш хөкемдары Вячеслав Лобов. Шул рәвешле, сезонның беренче трофее өчен “Нурлатнефть” НГДУсы, ДЮСШ, аграр техникум, 73нче янгын часте һәм Төрнәс авылы командалары көч сынашты. Финалда исә НГДУ белән янгын часте очрашты һәм нефтьчеләр янгын сүндерүчеләрне 2:0 исәбенә отып, дүртенче ел рәттән Кубок яулауга ирештеләр. Шунысын да әйтик, моңа кадәр уйнатылып килгән Кубок, өч ел рәттән җиңгәннәре өчен, нефтьчеләргә гомерлеккә тапшырылган иде һәм яңа трофейны да беренче булып алар отуга иреште. Әлбәттә, районда әлегә НГДУ волейболчыларын ота алучылар юк. Әмма башка командаларны телгә алып үтү дә кирәктер. Мәсәлән, ДЮСШ өчен X-XI сыйныф укучылары уйнады, әмма алар зур абыйлары каршында һич тә каушап калмадылар. Аграр техникум волейболчылары да көндәшләрен ярыйсы ук “өркетергә” сәләтле хәзер. Асылда, авыл егетләреннән торган янгын часте командасының финалга кадәр җитүе дә мактауга лаек. Авыллар арасында бердәнбер булган Төрнәс волейболчыларының энтузиастлыгын да билгеләп үтәргә кирәк. Әнә, төрнәслеләрнең алыштыргысыз һәм тынгысыз тренерлары Сергей Сороколетов быел да бәйрәм көннәренә кайткан студентларны, яшьләр-укучыларны ияртеп килгән иде. Кыскасы, сезон оештыручылар исәп тотканча, күтәренке рухта башланды. Алда исә шәһәр, авыл беренчелекләре көтә.

– Башта шәһәр беренчелегеннән башлап җибәрәчәкбез, аннан авыллар арасында аерым беренчелек уздыруны планлаштырабыз. Ә соңыннан исә шәһәр-авылларны кушып, районның иң яхшы волейбол командасын ачыклаячакбыз, – дип сезонга планнар белән уртаклашты район башкарма комитетының яшьләр эшләре һәм спорт бүлеге начальнигы Әнәс Нәбиуллин.