Нурлат районы делегациясе муниципаль форумда катнашты
29-30 гыйнварда Казанда «Кече ватан – Россия көче» II Бөтенроссия муниципаль форумының төбәк этабы узды.
«Яшәү өчен уңайлы мохит» темасы бик күп катнашучыларны җыйды, алар арасында бөтен Россиядән муниципалитетлар башлыклары, федераль һәм төбәк хакимият органнары вәкилләре, урбанистика һәм территориаль үсеш өлкәсендәге экспертлар бар. Чара Казанда Бәшир Рәмиев исемендәге ИТ-паркта узды.
"Хакимиятнең муниципаль дәрәҗәсе кешеләргә иң якын. Теге яки бу муниципалитетның тормыш сыйфаты үзара хезмәттәшлекнең ничек төзелүенә, урыннарда мәсьәләләрнең ничек тиз хәл ителүенә бәйле. Форум проблемалы кырны җирле дәрәҗәдә анализлауны һәм халыкны борчыган төрле темаларны һәм проблемаларны хәл итү өчен инструментлар эшләүне максат итеп куя», - дип билгеләп үтте үз чыгышында РФ Президентының эчке сәясәт идарәсе башлыгы урынбасары Евгений Грачев.
«Яшәү өчен уңайлы мохит» форумының төбәк этабы муниципаль берәмлекләр вәкилләре, экспертлар һәм иҗтимагый фикер лидерлары арасында тәҗрибә һәм фикер алышу өчен дә, федераль хакимият белән әңгәмә өчен дә мөһим мәйданчык булды.
Форумның беренче эш көнендә Россия муниципалитетлары вәкилләре Казанның «визит карточкасы» булган проектлар белән танышты.
"Җирле үзидарә-гавами хакимиятнең бердәм системасында гражданнарга иң якын звено. Минем Россия Президенты Администрациясенә җирле үзидарәгә зур игътибар бирүләре, шул исәптән шундый зур форумнар оештырулары өчен рәхмәт белдерәсем килә. Без һәркем белән тәҗрибә уртаклашырга әзер. Гражданнарның тормыш сыйфатын күтәрү-безнең өчен өстенлекле бурыч", - дип белдерде Татарстан Республикасы Рәисе Рөстәм Миңнеханов.
Икенче көндә муниципаль командалар Татарстан Республикасының уңайлы мохитне үстерү тәҗрибәсе белән таныштылар. Муниципалитетларда Татарстан Республикасы Рәисенең ишегалды территорияләрен комплекслы төзекләндерү буенча «Безнең ишегалды» программасын гамәлгә ашыру республиканың уникаль проектларының берсе булып тора, ул Нурлат районында да берничә ел гамәлгә ашырыла.
Эшлекле программа барышында эшләнгән резолюцияләр һәм йомгаклар «Кече Ватан – Россия көче» II Бөтенроссия форумында тәкъдим ителәчәк. Ул апрельдә Мәскәүдә «Россия» милли үзәге территориясендә узачак.