Кулланучыларны мәҗбүри хезмәтләрдән яклаячаклар
Роспотребнадзор кулланучыга өстәмә товарлар һәм хезмәтләр тагу практикасына чик куярга тиешле федераль закон проектын эшләде.
Документ «Кулланучылар хокукларын яклау турында» Россия Федерациясе Законының 16 статьясына үзгәрешләр кертүне күздә тота һәм Россия Федерациясе Хөкүмәте Рәисе йөкләмәсе кысаларында эшләнгән.
Кулланучыга өстәмә товарлар һәм хезмәтләр тагу намуссыз килешү алды практикасы булып тора, ул кулланучыларга тискәре йогынты ясый. Сатучының гамәлләре еш кына манипуляцияләүгә, тискәре нәтиҗәләр янауга нигезләнгән-мәсәлән, килешү төзүдән баш тарту, товар яки хезмәт күрсәтүгә ташламалар кулланмау, кулланучыдан зыян яки неустойка түләтү һәм башкалар. Тагу дип кулланучының ихтыярына йогынты ясый торган килешү алды практикалары санала, шуның нәтиҗәсендә ул үзе өчен отышлы булмаган шартларга ризалаша.
Документ шартнамә төзелгәнче кулланучыга өстәмә товарлар яки хезмәтләр тагуны турыдан-туры тыюны билгеләүне, шулай ук кулланучының өстәмә товарлар яки хезмәтләр сатып алуга ризалыгы турында автоматик тамгалар куюны күздә тота. Закон проекты нигезләмәләре шулай ук «Кулланучылар хокукларын яклау турында» гы Законның тиешле нормаларын Административ хокук бозулар турында Россия Федерациясе кодексының 14.8 маддәсенең 2.1 өлеше белән гармонияләштерүгә юнәлдерелгән.
4 декабрьдә Россия Федерациясе Хөкүмәте утырышында Федераль закон проекты аны билгеләнгән тәртиптә Дәүләт Думасына кертү өчен хупланды.