Нурлатның коммуналь хезмәт оешмасы хезмәткәрләре Яңа ел төнендә дә эшләде

2025 елның 2 гыйнвары, пәнҗешәмбе

Бәйрәм көннәре булуына карамастан, Нурлат районының ТКХ идарәче компаниясе хезмәткәрләре шәһәр юлларын чиста тотарга тырышалар.

Тракторчы Зөфәр Сәлаховны да шәһәрнең бер шәхси секторында юл чистартканда очраттык.

"Бу предприятиедә мин дүрт ел эшлим. Безнең эш гади түгел. Кайчагында безне сүгәләр дә, кайчагында мактыйлар да. Хуплау сүзләрен ишетү һәрвакыт күңелле. Без тырышабыз бит", - дип уртаклашты Зөфәр Сәлахов.

Ул, торак-коммуналь хуҗалык идарәсендәге башкалар кебек үк, 31 декабрьдә дә, 1 гыйнварда да эштә булды һәм бүген дә үз вахтасын калдырмый.

Коммуналь хезмәт хезмәткәрләре юлларны чистартудан тыш, аларны тагын да киңәйтәләр. Ә бу җәяүлеләр өчен дә, транспорт өчен дә өстәмә уңайлыклар тудыра.