Нурлатта Кыш Бабай резиденциясе ачылды

Кыш бабай белән киләсе елның 9 гыйнварына кадәр һәр көнне Мәдәният сарае фойесында очрашырга мөмкин булачак. Шәһәрнең Мәдәният сараенда бүгеннән Кыш Бабай резиденциясе эшли башлады. Биредә кунакларны Кыш Бабай, Кар Кызы һәм Кар бабай каршы ала. Теләге булган барлык балалар аларга шигырьләр сөйлиләр, җырлар җырлыйлар, матур фотозонада фотога төшәләр, моның өчен татлы бүләкләр алалар. Традиция буенча резиденция быел да «Татнефть» компаниясе һәм Хәйрия фонды ярдәмендә ачылды. "Балалар ел саен бу резиденциягә рәхәтләнеп йөриләр. Нурлатлылардан бары тик уңай бәяләмәләр генә алабыз. Ул бүгенге көннән алып 2025 елның 9 гыйнварына кадәр көн саен 15.00 сәгатьтән 21.00 сәгатькә кадәр эшләячәк.  Барлык теләүчеләрне дә чакырабыз”, - дип билгеләп үтте “Татнефть" ГАҖ бизнеска хезмәт күрсәтү үзәгенең Нурлат районы буенча социаль программаларны озата алып бару үзәге җитәкчесе урынбасары Ришат Сафиуллин. Резиденцияне ачуда Нурлат районы башлыгы урынбасары Иван Захаров катнашты. Ул нефтьчеләргә Яңа ел резиденциясен оештырганнары һәм үзәк мәйданны бизәүдә ярдәм иткәннәре өчен рәхмәт белдерде. Нурлат шәһәренең 2нче мәктәбе укучысы Рамина Сәмигулова беренчеләрдән булып Кыш Бабайга шигырьләр сөйләде. "Шигырьләр сөйләргә, җырларга, биергә яратам. Бәйрәмгә махсус 5 шигырь өйрәндем. Бүген аларны Кыш Бабайга сөйләдем, Яңа ел турында җыр җырладым. Шулай ук теләкләр белән хат яздым һәм чыршы астына салдым. Кыш бабай аны алган инде. Минем яңа ел хыялым тиздән тормышка ашар дип уйлыйм", - дип билгеләде ул.