Нурлатта Халыкара инвалидлар көненә багышланган бәйрәм концерты узды
Ул шәһәр Мәдәният сараенда узды.
Сәхнәдән тамашачыларны Нурлат районы Башлыгы Дамир Ишкинеев һәм ТР Экология һәм табигый ресурслар министры Александр Шадриков сәламләде.
"Сәламәтлек мөмкинлекләре чикләнгән кешеләр үз гомерләре белән ихтыяр көче һәм яшәү шатлыгы теләсә нинди авырулардан көчлерәк икәнен исбатлый. Сәламәтлеге нинди булуга карамастан, һәр кешенең җәмгыятьнең тулы хокуклы әгъзасы булу, белем һәм һөнәри күнекмәләр алу, физкультура һәм спорт белән шөгыльләнү мөмкинлеге булуы бик мөһим. Бүгенге көндә Нурлат районында I төркем инвалидлар – 423, II төркем инвалидлар – 2326, III төркем инвалидлар – 2192, инвалид балалар һәм мөмкинлекләре чикләнгән балалар-225, бер Бөек Ватан сугышы инвалиды һәм ике инвалидлыкка әйләнүче, махсус хәрби операциядә катнашучы инвалидлар – 7 кеше. Сәламәтлеге мөмкинлекләре чикләнгән кешеләргә ярдәм итү безнең районда һәрвакыт мөһим бурыч булды һәм шулай булып кала да. Бүген районда федераль ташламалар алучылар саны-5 меңнән артык кеше. Медицина ярдәмен вакытында һәм сыйфатлы алу мәсьәләсе дә өстенлекле булып кала", - дип билгеләп үтте үз чыгышында Дамир Ишкинеев.
Шунда ук сәхнәдә ул Нурлат районының иҗтимагый тормышында актив катнашкан, мөмкинлекләре чикләнгән кешеләрнең иҗтимагый хәрәкәтен үстерүгә өлеш керткән инвалидларга Рәхмәт хатлары тапшырды.
Бүләкләнүчеләр арасында картлар һәм инвалидлар интернат-йортында яшәүче Анатолий Анисимов та бар иде. 16 ел элек ул ике аягын да югалткан, 4 операция кичергән, бүген протезларда йөри. Ләкин шуңа да карамастан, рухын югалтмый. Ул эшсез утырырга яратмый, тернәкләндерүнең техник чараларын җыю һәм ремонтлау белән шөгыльләнә, җәй көне үз бүлмәсенең балконында помидорлар үстерә. Өстәвенә, ул коляскадагы инвалидларның беренче ярдәмчесе.
«Мин үземне инвалид дип санамыйм, тулы канлы тормыш белән яшим", - ди ул үзе турында.
Александр Шадриков та җылы теләкләрен җиткерде.
"Нурлат районында турыдан-туры киңәш һәм ярдәм таләп ителгән һәрбер кешенең ихтыяҗларына ихлас күңелдән, гаиләләрчә җылылык һәм наз белән карыйлар. Монда бүген көчле рухлы кешеләр җыелган. Сез, бернигә дә карамастан, шулкадәр күп яхшы һәм игелекле эшләр башкарасыз, безнең буын өчен үрнәк булып торасыз, рәхмәт сезгә», – дип билгеләде министр.
Александр Валерьевич һәм Дамир Азат улы махсус хәрби операция сугышчыларына бүләкләр тапшырдылар.
Концерт район үзешчәннәре, «Сәләт» балалар сәнгать мәктәбендә шөгыльләнүчеләр башкаруында музыкаль номерлар белән дәвам итте.