Дамир Ишкинеев «Заречный» балалар лагеренда төзелеш эшләрен карады
Шулай ук балалар сәламәтләндерү лагерен төзү барышы белән ТР ГИСУ генераль директоры урынбасары Виктор Никитенко танышты.
Яңа Әмзә авылында «Заречный» балаларны савыктыру лагеренда төзелеш эшләре тәмамланып килә. Бүген төзелеш объектында Татарстан Республикасы Баш инвестицион-төзелеш идарәсе генераль директоры урынбасары Виктор Никитенко булды. Нурлат муниципаль районы Башлыгы Дамир Ишкинеев озатуында ул эшләрнең барышы белән танышты, биредә үк подрядчылар, Башкарма комитет вәкилләре, шулай ук ресурслар белән тәэмин итүче оешмалар җитәкчеләре катнашында төзелешкә кагылышлы мөһим мәсьәләләр турында фикер алыштылар.
Бүгенге көндә объектта 75 кеше эшли, эшләр барлык биналарда да диярлек дәвам итә, түбә ябу, электрны монтажлау, сэндвич-панельләр, тәрәзәләр, ишекләр монтажлау, идәннәр җәю һ.б. алып барыла. территориядә 398,5 кв. м мәйданлы 4 корпус, аларның һәркайсы 30 йокы урынына исәпләнгән, персонал өчен йорт, клуб, 112,4 кв. м мәйданлы медицина пункты, ашханә һәм башка бүлмәләр төзелә.
Төзелешнең беренче этабын ел ахырына кадәр тәмамлау планлаштырыла. Дамир Азат улы төзелеш темпларын активлаштыру һәм эшләрне билгеләнгән вакытта тәмамлау бурычын куйды.