РОССИЯДӘ АЛКОГОЛЬГӘ БӘЙЛЕЛЕККӘ КАРШЫ «АЛКОГОЛЬСЕЗ ТОРМЫШ» КАМПАНИЯСЕ СТАРТ АЛА
Соңгы елларда безнең илдә алкоголь куллану күләменең планлы рәвештә кимүе күзәтелә. Бөтенроссия җәмәгатьчелек фикерен өйрәнү үзәге мәгълүматлары буенча, 2020 елның декабреннән 2024 елның августына кадәр алкоголь эчмәгән яки аны азрак куллана башлаган кешеләр саны 48% тан 65% ка кадәр арткан. Моңа күп очракта кешеләрнең мәгълүматлы булуы һәм «Демография» илкүләм проекты буенча гамәлгә ашырыла торган чаралар ярдәм иткән.
Алкогольне чиктән тыш куллану йөрәк-кан тамырлары, онкология авырулары, ашказаны-эчәк тракты авырулары һәм башка авырулар үсеше рискында мөһим фактор булып тора. Җан башына алкоголь куллану югарырак булган регионнарда кешеләрнең гомер озынлыгы түбәнрәк һәм үлүчеләр саны югарырак.
2024 елда Татарстанда алкоголь белән агуланулар саны арткан. Россия Кулланучылар күзәтчелегенең республика матбугат хезмәте мәгълүматларына караганда, гыйнвардан июльгә кадәр агулануның 341 очрагы теркәлгән, бу узган ел күрсәткечләреннән 5% ка күбрәк. Мәгълүматларга караганда, агуланучыларның 87% ы – 18 яшьтән өлкәнрәк гражданнар (298 кеше); 9% ы — 15 яшьтән 17 яшькә кадәрге яшүсмерләр (31 кеше); 4% ы — балалар (12 кеше). Зыян күрүчеләрнең 35% ы эшләмәүчеләр булып чыккан, 15% ы — эшләүче халык, 11% ы — пенсионерлар, 10% ы — мәктәп укучылары, 25% ы — халыкның башка катламнары.
Хәзерге вакытта алкогольгә бәйлелек вакытында бушлай медицина ярдәме алу өчен дәүләт наркология диспансерына, шулай ук сәламәтлек үзәкләренә мөрәҗәгать итәргә мөмкин. 8 800 200 0 200 кайнар линиясе телефоны буенча алкогольне чиктән тыш куллану аркасында сәламәтлекнең ни дәрәҗәдә зыян күрүен тикшерергә һәм сәламәт яшәү рәвеше буенча тәкъдимнәрне алырга мөмкин.
Россия Сәламәтлек саклау министрлыгының сәламәтлек турында takzdorovo.ru рәсми порталында һәркем экспертларның файдалы киңәшләрен һәм алкогольнең йогышлы булмаган авырулар үсешенә йогынтысы һәм аның нинди нәтиҗәләргә китерүе турында маддәләр табачак.
Киләсе елда «Озак һәм актив тормыш» дигән яңа илкүләм проект эшли башлаячак, анда йогышлы булмаган авыруларны профилактикалау һәм аларның куркыныч факторларына каршы көрәш чаралары каралачак.