Нурлатта РФ Дәүләт Думасы депутаты гражданнарны кабул итте
Кабул итүгә депутатка ике кеше мөрәҗәгать иткән.
Россия Федерациясе Федераль Собраниесе Дәүләт Думасы депутаты Айдар Метшин Нурлатта гражданнарны кабул итте.
Яңа Иглай авыл җирлеге башлыгы вазыйфаларын башкаручы Марат Хәмидуллин депутатка Яңа Иглай авылында мәдәният объекты төзелеше турында сорау белән мөрәҗәгать итте. "Иске мәдәният йорты хәзер авария хәлендә. Бүгенге көндә авылда 593 кеше яши, шуларның 90 ы – 16 яшьтән 30 яшькә кадәрге яшьләр. Безнең халык бик актив - крестьян-фермер хуҗалыклары күп. Мәдәният объекты бик кирәк, һәм ул буш тормас", - дип мөрәҗәгать итте Марат Ибраһимович.
Кабул итүдә катнашкан Нурлат районы Башлыгы Дамир Ишкинеев билгеләп үткәнчә, бу авылда мәдәният объектын төзүдә ярдәм итүне сорап хатлар берничә тапкыр ТР Мәдәният министрлыгына җибәрелгән, авыл халкы ТР Дәүләт Советы депутатларына да мөрәҗәгать иткән. Кызганычка каршы, социаль-мәдәни объектларны төзү буенча республика программасы тәмамланган инде. Айдар Рәис улы мәдәният йорты төзелешен федераль программага кертү мөмкинлеген карарга вәгъдә итте. Ә әлегә вакытлыча клубны җирле мәктәптә уку һәм тәрбия процессына зыян китермичә урнаштыру мөмкинлеген эзләргә киңәш итте.
Депутатка Ибрик позывнойлы сугышчы та мөрәҗәгать итте, ул хәзер яралану сәбәпле ялда әле. Махсус хәрби операциягә ул агымдагы елның июнендә контракт буенча киткән. Көрәшче билгеләп үткәнчә, ул әлегә кадәр контрактны имзалаганда 500 меңнән артык күләмдә бер тапкыр бирелә торган түләү алмаган. Айдар Рәисович, мәгълүматларны ачыклап, нурлатлыга бу мәсьәләне һичшиксез хәл итәргә вәгъдә итте. Сугышчының сәламәтлеген торгызуда тагын ярдәм кирәклеген белгәч, бу эштә дә ярдәм итәргә карар итте. "Ватаныбызны, мәнфәгатьләребезне саклаганыгыз өчен рәхмәт. Кулыбыздан килгәннең барысын да эшләрбез", - диде ул.