Нурлатлылар Хөкүмәт комиссиясе утырышында катнашты
Бүген Казанда юл хәрәкәте иминлеген тәэмин итү буенча Татарстан Республикасы Хөкүмәт комиссиясенең чираттагы утырышы узды.
Ул Татарстан Республикасы Премьер-министры урынбасары – Татарстан Республикасы Министрлар Кабинеты Аппараты җитәкчесе, юл хәрәкәте иминлеген тәэмин итү буенча Татарстан Республикасы Хөкүмәт комиссиясе рәисе урынбасары Шамил Гафаров рәислегендә узды.
Монда юл хәрәкәте иминлеген тәэмин итү эшчәнлеге нәтиҗәләре һәм республикада аварияләр торышы турында Татарстан Республикасы буенча Юл хәрәкәте иминлеге баш дәүләт инспекторы Рөстәм Гарипов хисап тотты. Утырышта шулай ук Татарстан Республикасы автомобиль юлларында юл хәрәкәте иминлеген арттыру буенча инженерлык чараларын гамәлгә ашыруга һәм юл-транспорт комплексы оешмаларының кышкы чорда гомуми файдаланудагы автомобиль юлларын карап тоту эшенә әзерлегенә, аварияләр торышына һәм федераль әһәмияттәге автомобиль юлларында юл хәрәкәте иминлеген тәэмин итү чараларына кагылышлы мәсьәләләр каралды.
Нурлатлылар утырышка Нурлат муниципаль районы Башкарма комитеты җитәкчесенең беренче урынбасары Радик Гыйниятуллин җитәкчелегендә видеоконференцэлемтә аша кушылды.