Нурлат районында авыл хуҗалыгы һәм эшкәртү сәнәгате алдынгыларын тәбрикләделәр
Халыклар дуслыгы йортында авыл хезмәтчәннәренә багышланган бәйрәм чарасы узды.
Бүген Нурлат районында авыл хуҗалыгы һәм эшкәртү сәнәгате алдынгыларының традицион слеты узды. Игенчеләр һәм терлекчеләр, агрономнар һәм зоотехниклар, икмәк пешерүчеләр, бухгалтерлар һәм күп еллар авыл хуҗалыгы тармагында эшләүче башка хезмәтчәннәр, авыл хуҗалыгы оешмалары җитәкчеләре, фермер һәм шәхси ярдәмче хуҗалыклар башлыклары, шулай ук хөрмәтле ветераннар чараның мәртәбәле кунаклары булды.
Чара җирле авыл хуҗалыгы җитештерүчеләренең икмәк, сөт һәм ит продукциясе, яшелчә, кош ите, бал, су һ.б. продукциясе күргәзмәсеннән башланды. биредә Нурлат аграр техникумы студентлары Исмаил Билданов, Павел Туйбаторов, Илназ Сабитов һәм Никита Нестеров уку йортында алган белгечлекләре, шулай ук җәйге каникул вакытында кырларда һәм производствода эшләп алган тәҗрибәләре турында сөйләделәр. Районның авыл хуҗалыгы һәм азык-төлек идарәсе башлыгы Ирек Шәрәфетдинов төп күрсәткечләр белән таныштырды: 67 мең тоннадан артык ашлык җыеп алынган, уңдырышлылык гектардан 26 центнердан артык. 2024 елның 9 аенда районның авыл хуҗалыгы предприятиеләре һәм фермер хуҗалыклары терлекчеләре тарафыннан 37 мең тоннадан артык сөт савылган. Бер сыерның продуктивлыгы-5303 кг. 1,3 мең тонна ит җитештерелгән, яшь терлекләрнең уртача тәүлеклек артымы – 771 гр.
Чараның тантаналы өлешендә авыл хезмәтчәннәрен Нурлат муниципаль районы Башлыгы Дамир Ишкинеев котлады. “Сезгә авыр хезмәтегез, крестьян бурычына тугрылыгыгыз һәм туган җиребезне яратуыгыз өчен рәхмәт белдерәм", – диде Дамир Азат улы һәм алдынгыларга Мактау грамоталары, Рәхмәт хатлары һәм акчалата сертификатлар тапшырды.
Татарстан Республикасы Авыл хуҗалыгы һәм азык-төлек министры исеменнән нурлатлыларны «Россельхозцентр» ФДБУнең Татарстан Республикасы филиалы җитәкчесе Виталий Новичков котлады. Ул шулай ук тармак алдынгыларына озак һәм намуслы хезмәтләре өчен ведомство бүләкләре тапшырды.
Чарада Татарстан Республикасы Дәүләт Советы депутаты Шамил Яһудин катнашты. Бүләкләүләр Нурлат районы талантлары башкаруында концерт номерлары белән чиратлашып барды.