Ике сменада эшләп оттылар

“Чөгендер казуны 10 көн эчендә төгәлләргә, эшне бар җирдә дә тәүлек әйләнәсе оештырырга”, – район башкарма комитеты  җитәкчесе Равил Кузюров районның авыл хуҗалыгы хезмәтчәннәре алдына әнә шундый бурыч куйды. Бу көннәрдә басуларда эш тәүлек әйләнәсе тынып тормый. Ә “Сөләйманов Ә.И” хуҗалыгында чөгендер казуны узган атна азагында районда беренче булып төгәлләделәр.  

Якшәмбе көнне районның чөгендер игүче хуҗалыкларында  казылган 185 гектар татлы тамырның 140лап гектары “Южная” агрофирмасына туры килә. Бер көндә шулкадәр чөгендер казый алуларының сере исә гади: алдагы көнне генә үзләренең өч комбайннарына ярдәмгә “Сөләйманов Ә.И” хуҗалыгыннан тагын 4әү килеп өстәлде бит. Шуңа да калган 350ләп гектар чөгендер әлләни куркыныч түгел, дәррәү эшләгәндә ике-өч көнлек эшләре калып бара ләбаса – көннәр генә мөмкинлек бирсен. 

Ә “Южная” өчен чөгендер уңышын җыеп алу – быел аеруча  зур сынау. Чөнки татлы тамыр мәйданнары быел  узган елгыга караганда 700ләп гектарга артыграк. Районда иң зур мәйданнар аларга туры килә – 3500 гектар. Уңышы да сөенерлек, тик менә быел аны җыеп алу гына кыенрак бара,  яңгырлар аркасында казуны да, ташуны да туктатып торган көннәре бар. Ә менә эшне инде чөгендер алуга төшкәнне бирле ике сменада оештыралар. 

- Аяз көннәр торганда, беренче смена иртәнге 6дан кичке 6га кадәр, икенче смена кичке 6дан иртәнге 6га кадәр эшләде. Быел шулай эшләмичә булмый да, - ди хуҗалыкның Киекле бүлекчәсе агрономы Равил Бикинеев. –Егетләр сыната торган түгел безнең. Алексей һәм Петр Аниськиннар, Владимир Антипов, Николай Казаков, Ринат Хәмәтшин, Радик Гыйльманов, Владимир Чернов вакыт белән исәпләшеп тора торганнардан түгел.  

Әнә, дүшәмбе көнне дә һава торышының коры булуыннан  максималь файдаландылар -  берьюлы өч басуда эш кайнады. “Южная” белән “Сөләйманов Ә.И”нең 7 комбайны өч басуга бүленеп эшләделәр. Яңа Иглай авылы янәшәсендәге кыр да комбайннар тавышыннан гөрләп торды. Заманча “Ропа”ларның артларыннан күз иярми, басуның бер башыннан икенчесенә кадәр араны бик тиз  әйләнеп чыгалар да, җыелган чөгендерне   басу читенә китереп тә бушаталар. Әлеге комбайннарның өстенлеге дә шунда – бер вакытта яфрагын да ура, чөгендерен дә казый, артларыннан машина ияреп йөрергә дә кирәкми. Чөгендер басу читендә дә озак ятмый, Владимир Чернов үзенең шулай ук заманча төягеч “Ропа”сы белән татлы тамырны заводка озатып тора. 

- Комбайн искиткеч. Бер машинаны 3–5 минут эчендә төяп җибәрәм, - ди комбайнчы. – Кичә көн дәвамында 156 машина чөгендер төядем. Бүген дә шуннан ким булмас. 

Хуҗалыкта 9 ел эшли икән инде Владимир, “Ропа”сын ике ел элек яңа килеш аңа ышанып тапшырганнар. Баштарак борт компьютеры белән идарә итү авыррак булып тоелса да, серенә тиз төшенгән. Өстәвенә, комбайннарга сервис хезмәте күрсәтелә, төзексезлекләр белән проблема юк икән. 

Ә Владимирның озак сөйләшеп торырга вакыты юк. Шул кыска гына вакыт эчендә дә  комбайн янына чөгендер ташу машиналары килеп тезелә. Бүген генә дә 13 машина ташып тора чөгендерне, төяп кенә өлгерт! 

“Южная”ның соңгы гектарларында  эш әнә шулай күмәк рәвештә, яхшы кәеф белән дәвам итә. Район буенча исә тагын  1000 гектардан артыграк чөгендер калып бара. Иң зур эш фронты – “Нурлат сөте” хуҗалыгында – 600 гектардан артыграк, “АгроРазвитие”леләрнең 200ләп, “Тулпар-Агро”лыларның 150ләп гектар татлы тамыр чыгарасылары бар әле.