Нурлат льготачылары өчен «Куркынычсызлык мендәре» буларак социаль пакет
Федераль льготалы-социаль пакеттан баш тартучыларның дөрес карар кабул итү өчен бик аз вакыты калды.
Ә алар, сугыш һәм сугыш хәрәкәтләре ветераннары, гомуми авыру инвалидлары, чернобыльлеләр өчен бу бигрәк тә мөһим: аларның бушлай дарулар, шифаханәгә юлламалар ала алулары аларның сайлавына бәйле. Дмитрий Х. инвалидлыкның беренче группасы бар, производстводагы имгәнү нәтиҗәсендә ишетү сәләтен югалткан. Тулысынча түгел, бер колагы, ул әйтмешли, бик яхшы эшли.
- Менә инде 20 елга якын бер колагым ишетми. Ул вакытта табиблар мөмкин булганның барысын да эшләделәр, дәвалап булмый, диделәр. Хәзер, бәлки, мондый очракларда операцияләр дә ясыйлардыр, әмма инде куркам. Социаль пакеттан шундук баш тарттым. Әмма берничә елдан соң проблемалар башланды, шул ук җәрәхәт ачылды. Дарулар яздылар. Хәтерлим, даруханәгә килгәч һәм миңа аларның бәясен әйттеләр, сүзсез калдым. Бу сентябрьдә булды, ярый әле миңа ни булганын аңлаттылар, тиз генә Пенсия фондына киттем һәм социаль пакетны яңартуга гариза яздым. Һәм яңа елның гыйнварыннан гына даруларны бушлай ала башладым. Шул вакыттан бирле социаль хезмәтләр җыелмасыннан баш тартканным юк. Берничә тапкыр путевканы бушлай бирделәр, шулай ук зур плюс. Олы яшьтәге ир-атның тарихы социаль пакеттан баш тарткан нурлатлылар сөйләгән башка бик күпләрнекенә охшаш. Хәлне төзәтер өчен, мең ярым сум урынына дәвалануга да, шифаханәдә ял итү мөмкинлегенә дә ышаныч булдыру өчен санаулы көннәр калып бара.
- Акчалата чагылышта социаль хезмәтләр җыелмасы 1 578 сумнан бераз артыграк, шуның 1 215 сумы – даруларга, 188 сумы-шифаханә – курортларда дәвалануга, 174 сумы-дәвалану урынына бару һәм кире кайту өчен бирелә, - диде СФРның Татарстан Республикасы буенча Нурлат районындагы клиентлар хезмәте җитәкчесе Рушания Шакирова.
Сүз уңаеннан, билгеләнгән акчалата эквивалентның зурлыгы натураль хезмәт нәкъ менә шушы суммага күрсәтелә дигәнне аңлатмый. Мәсәлән, дәвалану урынына барып кайту эквиваленты 174 сумга тигез. Әмма бу суммага тернәкләндерү урынына, мәсәлән, Казанга кадәр барып җитеп буламыни? Әгәр дә льготачы социаль пакетны яңартса, анда бару һәм кире кайту аның өчен бушлай булачак. Дарулар белән дә, путевка белән дә шулай... Әгәр 1 октябрьгә кадәр социаль хезмәтләр җыелмасын яңарту турында гариза бирмәсәк тә, шактый акча таләп итә торган авыру ачыкланса да, ел дәвамында программага кире кайтару каралмаган.
– Социаль пакеттан баш тартучыларның авырулары кискенләшкән очракта медицина оешмалары ашыгыч ярдәм күрсәтәчәк, стационар шартларда дәваланачак, әмма бу елына бер-ике курс, – дип билгеләп үтә Нурлат үзәк район хастаханәсе баш табибы Айдар Сәгъдиев, социаль хезмәтләр җыелмасын саклап калу кирәклеге турында төп дәлилләрне китереп. - Даруларны даими куллануны таләп итә торган авырулар да бар. Хроник авыруларны амбулатор дәвалау аларны даими куллануны таләп итә. Әмма таләп ителгән барлык дарулар да стационарларда дәвалау стандартларына керми. Дарулар белән тәэмин итү төп авыру буенча гына түгел, ә симптомлы дәвалауны да кертеп, профилактик максатларда да гамәлгә ашырыла.