Биляр – Озеро авылында колхозның легендар рәисенең тууына 100 ел тулуына багышланган истәлек тактасы ачылды
Агымдагы елның июнендә Бөек Ватан сугышы ветераны, «Коммунизмга юл» колхозының легендар рәисе Павел Иванович Ильинның тууына 100 ел тулды.
Павел Иванович 1924 елның 4 июнендә Октябрь (Нурлат) районы Чуаш Мәнҗесе крестьян гаиләсендә авылында туа. Мәктәпне тәмамлагач, туган мәктәбендә укытучы булып эшли башлый.
Яшьлеге Бөек Ватан сугышының дәһшәтле елларына туры килә: Курск янында сугыша, Харьковны азат итүдә катнаша, аннан соң Көнчыгыш Европада була, сугышны Австриянең Вайце шәһәрчегендә тәмамлый. Лейтенант, взвод командирының сугышчан юлы данлы, «Батырлык өчен», «Сугышчан казанышлар өчен» медальләре, Дан, Кызыл Йолдыз, Ватан сугышы орденнары белән бүләкләнгән.
1945 елның декабрендә демобилизацияләнә һәм, кече ватанына кайткач, сәркатиб, аннары Октябрь районы Башкарма комитеты рәисе урынбасары булып эшли башлый. Партия өлкә комитеты карары белән аны утыз меңчеләр арасыннан «Виктория» колхозына председатель итеп җибәрәләр, биш елдан соң ул «Коммунизмга юл» колхозы белән җитәкчелек итә башлый. Павел Иванович данлы хезмәт юлын узган, шуның өчен «Почет Билгесе» ордены һәм башка бүләкләр белән бүләкләнгән.
Биләркүл мәктәбе янында истәлек тактасы ачылу уңаеннан үткәрелгән тантаналы митингта Павел Ильинның сугышчан һәм хезмәт батырлыгы турында сөйләделәр. Монда Павел Ивановичның туганнары һәм якыннары, мәктәп укучылары, авыл кешеләре җыелды.
"Павел Иванович уникаль шәхес иде, интеллигент, бик кешелекле. Ул 30 ел «Коммунизмга юл» колхозы белән җитәкчелек итте, ул аның кул астында һәрвакыт алдынгы булды. Бу искиткеч кешене искә алырга килгән һәркемгә рәхмәт. Аның турындагы истәлек безнең йөрәкләрдә яшәячәк һәм сакланачак», – дип билгеләп үтте Нурлат районы Башлыгы Дамир Ишкинеев, Павел Ильинның данлы тормыш юлы турында сөйләгәндә.
Легендар колхоз рәисе турында күп еллар бергә эшләгән кешеләр дә җылы сүзләр әйттеләр, колхозны үстерү, авыл халкының тормышын яхшырту өчен башкарган игелекле эшләрен искә төшерделәр.
Павел Ивановичның балалары, оныклары да җылы хатирәләре белән уртаклаштылар. Истәлек тактасын ачып, тантаналы чарада катнашучылар чәчәкләр салдылар, аннары мәктәп музеена үттеләр, анда Павел Ильинның шәхси документлары һәм фотосурәтләре куелган стенд урнаштырылган.