Нурлат Курск өлкәсеннән эвакуацияләнүчеләрне кабул итте
Нурлатка Курск өлкәсе интернат-йортларында яшәгән 10 өлкән яшьтәге кеше килде.
Бүген иртән Нурлат өлкәннәр һәм инвалидлар интернат-йортына Курск өлкәсеннән өлкәннәр килде. Алар белән Нурлат районы Башлыгы Дамир Ишкинеев озатуында ТР Хезмәт, мәшгульлек һәм социаль яклау министры Эльмира Зарипова очрашты. Ул аларның яшәү шартлары белән танышты, хәлләре белән кызыксынды.
"Без сезнең барыгызга да бик шат. Сезгә монда рәхәт булыр. Әгәр берәр нәрсә кирәк икән, теләсә кайсы вакытта мөрәҗәгать итегез", - диде эвакуацияләнгән өлкән яшьтәге гражданнарга чәй өстәле янында Дамир Ишкинеев.
Курскилылылар сөйләгәнчә, моңа кадәр алар Татарстанда булмаган, шуңа күрә беркадәр дулкынлану кичергән.
"Без үзебезне шулай җылы каршы алырлар дип көтмәгән идек. Без Курскидан поезд белән килдек, Самарада безне Татарстаннан министр урынбасары, Гадәттән тыш хәлләр министрлыгы хезмәткәрләре каршы алды, ә волонтерлар күп иде, табиблар да бар иде. Без моны көтмәгән идек! Автобусларга утырттылар, безне Нурлатка алып килделәр. Автобус бик уңайлы булды. Без барысына да бик рәхмәтле. Безне монда ачык күңел белән каршы алдылар! Безне коендырдылар, киендерделәр, барысын да бирделәр. Барысы өчен дә зур рәхмәт", - дип уртаклашты Елена Шебунинская, аңа 81 яшь.
Әлегә алар карантин блогында урнаштырылган. Интернат-йорт директоры Роберт Газизуллин әйтүенчә, иртәгә килүчеләрнең барысы да медицина тикшерүе уза башлаячак. Алар өчен шәһәр буенча экскурсия программасын уздыру планлаштырылган инде.