Нурлатта район һәм шәһәр Советларының чираттагы сессиясе узды
Нурлат районы һәм Нурлат шәһәре Советларының чираттагы сессиясе район Башлыгы Дамир Ишкинеев җитәкчелегендә узды.
Сессиянең көн тәртибенә биш сорау куелды. Беренче дүртесесе Биләркүл авыл җирлеге бюджетына, генпланына, районны территориаль планлаштыру схемасына үзгәрешләр кертүгә, балигъ булмаганнар эшләре буенча комиссия төзүгә кагылса, бишенчесе район Башлыгы урынбасары вәкаләтләрен вакытыннан алда туктату мәсьәләсенә карады, бу постны 2020 елның сентябреннән Линар Маняпов биләде.
"Сезнең хезмәт казанышларыгыз лаеклы бәяләнде һәм күп санлы бүләкләр белән билгеләнде. Нурлат районының үсеше һәм чәчәк атуы өчен башкарган эшләрегез тирән ихтирамга лаек", - диде район Башлыгы Дамир Азат улы.
Линар Маняпов хезмәт эшчәнлеген 1997 елда Яңа Иглай мәктәбенең физкультура укытучысы булып башлаган. Соңыннан бу белем бирү учреждениесен җитәкләгән. Район Башкарма комитетының яшьләр һәм спорт бүлеге начальнигы, «Рассвет» АХК рәисе, Нурлат интернат-мәктәбе директоры булып эшләгән, аннары муниципаль хезмәттә төрле вазыйфаларны башкарган. Линар Нурисламовичны һәр биләгән вазыйфасында да хезмәт сөючәнлеге, принципиальлеге, оештыру сәләте аерып тора.
"Мин 10 ел муниципаль хакимият вазыйфаларында эшләдем. Бу еллар эчендә күп нәрсәне җиңәргә, кешеләр белән, беренче чиратта коллективлар белән бик күп эшләргә туры килде. Башкарма комитетның масштабы башка: бу төзелеш тә, торак-коммуналь хуҗалык мәсьәләләре дә, башкалар да. Барыннан да элек мин үзем өчен зур тәҗрибә тупладым. Төзелеш, социаль объектларны капиталь ремонтлау буенча күп эшләр башкарылды. Бу җәһәттән, район башлыгы бәяләвенчә, минем дә мөһим роль уйнавым белән горурланам. Аннары авыл җирлекләре башлыклары белән, район Советында эш, сайлауларны оештыру һәм үткәрү булды... Без үзара салымны уңышлы үттек, республикада алдынгы урыннарда тордык. Мин барлык җирлек башлыкларына, район халкына моңа аңлап караганнары өчен рәхмәтлемен: су белән тәэмин итү системасы, юллар, төзекләндерү, техника сатып алу буенча зур эшләр башкарылган. Районнан намус белән башка эшкә китәм, чөнки бик күп нәрсәләр эшли алдым һәм бу эшләрнең үзәгендә булдым. Мин үз районымны яратам, аның патриоты булып торам. Алга таба да үз мөмкинлекләрем һәм вәкаләтләрем белән ярдәм күрсәтергә әзермен", - диде Линар Маняпов.
Сессиядә район Башлыгы Дамир Ишкинеев Линар Маняповка «Татарстан Республикасы җирле үзидарәсен үстерүдәге казанышлары өчен» медален һәм истәлекле бүләк тапшырды. Авыл җирлекләре башлыкларыннан да аңа карата бик күп яхшы сүзләр әйтелде. Линар Нурисламович хезмәт эшчәнлеген ТР Экология һәм табигый байлыклар министрлыгында дәвам итәчәк.
Көн тәртибендәге барлык мәсьәләләр буенча депутатлар уңай карарлар кабул итте.